İranın xarici işlər naziri Hüseyn Əmir Abdullahiyan üçüncü ölkələrin Xəzər dənizində hərbi mövcudluğunu təmin etmək səylərinin regionun maraqlarına zidd olduğunu bildirib.
Elchi.az İrna.ir-ə istinadən xəbər verir ki, o, bu barədə Türkmənistanın xarici işlər naziri Rəşid Meredovla danışıqlar zamanı bildirib.
İran Xarici İşlər Nazirliyinin “Telegram” kanalında yayımlanan bəyanatda deyilir:
“Əmir Abdullahyan bəzi üçüncü ölkələrin Xəzər dənizində hərbi mövcudluğunu təmin etmək üzrə hərəkətlərinin regionun maraqlarına zidd olduğunu bildirib”.
İranın xarici işlər naziri həmçinin üçüncü Xəzər İqtisadi Forumunun “Xəzər beşliyi” ölkələri: Azərbaycan, İran, Qazaxıstan, Rusiya və Türkmənistanın hökumət başçıları səviyyəsində keçirilməsini təklif edib. Bundan əvvəlki forum 2022-ci il oktyabrın 5-6-da Moskvada keçirilib.
Martın 28-də İran diplomatiyasının rəhbəri Türkmənistan prezidenti Sərdar Berdiməhəmmədov ilə danışıqlar aparıb: “Biz enerji, tranzit, nəqliyyat, elm və texnologiya sahələrində əməkdaşlığı gücləndirmək barədə razılığa gəldik, ölkələr arasında ticarətin həcmi artır və biz onun gələcəkdə sürətli artımını gözləyirik”, – deyə nazir görüşdən sonra jurnalistlərə deyib.
O, əlavə edib ki, İran prezidenti İbrahim Rəisi gələcəkdə Aşqabada rəsmi səfər edəcək.
Yeganə
Son şərhlər