İranın xarici işlər naziri Abbas Araqçı İsrailin baş naziri Benyamin Netanyahunu həbsxanaya düşməkdən qaçmaq məqsədilə ABŞ-ı İranla növbəti müharibəyə sürükləməkdə ittiham edib.
Elchi.az xəbər verir ki, Netanyahunun İrana qarşı səsləndirdiyi fikirlərə “X” sosial şəbəkəsində cavab verən İran naziri yazıb: “Netanyahu həbsdən qaçmaq üçün ABŞ-ı yeni müharibəyə sürükləyir; o, bunun İsrail və ABŞ prezidenti üçün yarada biləcəyi nəticələri heçə sayır”.
İranın, “işi bitirmək” məqsədi daşıyan əvvəlki hücumlardan daha da güclənərək çıxdığını vurğulayan Araqçı bildirib: “Yenidən bəxtinizi sınamaq istəyirsiniz? Buyurun, cəhd edin. Amma ehtiyatlı olun – bizim də yarımçıq qalmış işlərimiz var”.
*The Times of Israel* nəşrinin məlumatına görə, İsrailin baş naziri Benyamin Netanyahu qarşıdan gələn seçkiləri “varlıq-yoxluq məsələsi” (ekzistensial əhəmiyyət daşıyan) kimi xarakterizə edərək, təqdim etdiyi təhlükəsizlik doktrinasında “İran rejiminin devrilməsi” hədəfinə toxunub.
İran iqtisadiyyatının pisləşməsinin ictimai təzyiqi artırdığını və yeni etirazlara səbəb ola biləcəyini iddia edən Netanyahu deyib: “Planımız hərtərəfli və qətiyyətlidir, məqsədi isə rejimin süqutuna nail olmaqdır. Bütün təhlükəsizlik qurumlarına verdiyim göstəriş bundan ibarətdir”.
Şayəstə
