Bakı Dövlət Universitetinin Tarix fakültəsinin Qafqazşünaslıq üzrə rus bölməsinin I kurs RG-075 qrupu Azərbaycan dili dərsini qürurverici tariximiz olan Zəfər gününə həsr ediblər. 44 günlük müharibə – 27 sentyabrdan Zəfər Gününə – 8 Noyabra qədər olan möhtəşəm tarixi günlər tələbələrin hazırladıqları mövzularda əhatə olunub.
Hərb tariximizin şanlı səhifəsi olan Zəfər gününə həsr olunan dərsi fənn müəllimi dosent Qətibə Quliyeva tələbələrin iştirakı ilə himnimizlə başlamışdır. Q.Quliyeva bildirib ki, Ali Baş Komandanımızın qətiyyətli rəhbərliyi, vətənpərvər xalqımızın birliyi və qalib ordumuzun qəhrəmanlığı esse və şeirlərlə təqdim olunub. Ümummilli liderimiz Heydər Əliyevin “Mən fəxr edirəm ki, azərbaycanlıyam” ifadəsini əsas götürən və kəşfiyyat komandiri qazi atası ilə qürurunu dilə gətirən Azərin İsmayılova, xalqımıza qalibiyyət sevincini yaşadan Ali baş Komandanın “Qarabağ Azərbaycandır” şüarını və göstərdiyi qətiyyəti ifadə edən Cəbrayıl Ağayev, müharibənin ağrı-acısını, dəhşətini təsvir edən Elbrus Hüseynov, müzəffər ordumuzun qəhrəman əsgərinə səmimi hisslərini qələmə alaraq məktub yazan Ağayar Bağırov, general-mayor Polat Həşimovu fəxarət və kövrək duyğularla yad edən Sənubər Sultanova, “Vətən” şeirini ən dərin duyğularla söyləyən Səbinə Səfərova, müharibə dövründə Gəncədə, Bərdədə yaşanan hadisələrdən bəhs edən Elvin Süleymanov, qəlbimizdə daim yaşayacaq qəhrəman şəhidlərimizi şeirlə yad edən Fidan Cəbrayılova, azad olan şəhərlərin, kəndlərin, qəsəbələrin adlarını və alındıqları günləri bir-bir sadalayan Nuray Əsədova, “Şuşa, Sən Azadsan” adlı essesində azad Şuşanı təsvir edən Zivər Əliyeva, torpağına göz dikənə qılıncdan kəskin olan, lakin hər zaman sülhə, barışa meyilli xalqımızın “Sülh” istəklərini şeirlə səsləndirən Mələkxanım Babayeva qəhrəmanlıq salnaməsini yazan xalqımızın vətənpərvərliyini, mübarizliyini fərəh və qürurla təqdim ediblər. Zəfər Gününün milli qürur və şərəf tariximiz olduğunu deyən dos. Q.Quliyeva dərsi “Yaşa, Vətən, çox yaşa; Yaraşır Zəfər sənə! Alqış, min kərə alqış; Zəfəri bəxş edənə!” şeiri ilə bitirən tələbələrə hazırladıqları təqdimata görə təşəkkür edib və onları Zəfər Günü münasibətilə təbrik edib.
Son şərhlər