İslam İnqilabı Keşikçiləri Korpusunun (SEPAH) sözçüsü Hüseyn Möhebbi bəyan edib ki, əgər ABŞ İrana qarşı yeni hücuma keçərsə, onlar həm silahların, həm də müharibənin özünün coğrafiyasını dəyişəcəklər.
Elchi.az xəbər verir ki, Möhebbi bu fikirləri televiziya proqramında çıxışı zamanı cari hadisələrlə bağlı səsləndirib.
ABŞ və İsrailin İrana qarşı yeni hücum ehtimalını dəyərləndirən Möhebbi deyib:
“Yeni hücum baş verəcəyi təqdirdə, müdafiə və hücum strategiyalarımız əhəmiyyətli dəyişikliklərə məruz qalacaq. Biz silahların və müharibənin coğrafiyasını dəyişəcəyik. Dünyanı heyrətə salacaq qabaqcıl imkanlara malik yeni silahlar yerləşdirəcəyik. Hədəflərimiz əvvəlki kimi deyil; biz hələ zərbə vurulmamış yeni hədəflər müəyyən etmişik”.
İranın uzunmüddətli münaqişəyə hazır olduğunu bildirən Möhebbi əlavə edib: “Bizim fikrimizcə, müharibə müxtəlif mərhələlərdən ibarətdir; o, sadəcə bitmir, davam edir. İnqilab Keşikçiləri müharibəyə onsuz da hazır idilər və indi daha da hazırdırlar”.
İddia: Yeni regional nizamı ABŞ deyil, İran müəyyən edir
İnqilab Keşikçiləri Korpusunun indiyədək ABŞ ilə heç bir təmasının olmadığını və silahlı qüvvələrin diplomatiyada iştirak etmədiyini qeyd edən Möhebbi, ordunun əsas vəzifəsinin ölkəni müdafiə etmək olduğunu vurğulayıb.
Möhebbi ABŞ-ın bölgədəki hegemonluğunun sona çatdığını və yeni nizamı ABŞ-ın deyil, İranın müəyyən etdiyini iddia edib.
O, ABŞ-ın üstün müdafiə imkanlarına malik olması təsəvvürünə əsaslanaraq regional ölkələrdə hərbi bazalar yaratdığını, lakin bu bazaların İranın zərbələri nəticəsində yararsız hala salındığını qeyd edib.
Şayəstə
