ABŞ Prezidenti Donald Tramp qabaqcıl süni intellekt modellərinə qarşı dövlət tənzimləmələrinin gücləndirilməsi ilə bağlı çağırışları rədd edib. Süni intellektlə bağlı narahatlıqları “uydurma” adlandıran Tramp bildirib: “Yeganə təhlükəsizlik tədbiri güclü və ağıllı prezidentdir. ABŞ-da isə belə bir prezident bolca var”.
Elchi.az xəbər verir ki, Tramp süni intellektə zərbə vurmaq məqsədi daşıyan bir sui-qəsdin olduğunu iddia edib və bildirib ki, modellərin nəzarətdən çıxmasının qarşısını almaq üçün onun şəxsi nəzarəti kifayətdir.
Bu narahatlıqları “fırıldaq” adlandıran Tramp məsələni “qlobal istiləşmə uydurması” və onun seçki kampaniyası ilə Rusiya hökuməti arasında mümkün əlaqələrə dair araşdırma ilə müqayisə edib.
Həftəsonu jurnalistlərə süni intellektdən şəxsən istifadə etdiyini desə də, köməkçiləri qeyd edirlər ki, bu istifadə əsasən onun sosial media səhifələri üçün şəkillərin yaradılması ilə məhdudlaşır.
Ağ Ev rəsmiləri narahatdır
Administrasiya daxilindəki digər şəxslər, o cümlədən vitse-prezident Cey Di Vens (JD Vance), “Anthropic” şirkətinin baş direktoru Dario Amodei kimi rəhbərlərin daha ciddi dövlət nəzarəti tələb etməsinin arxasında duran motivlərlə bağlı şübhələrini ifadə ediblər.
Hətta bəzi Ağ Ev rəsmiləri Trampın süni intellektin təhlükələrinə qarşı nümayiş etdirdiyi laqeydlikdən şəxsi söhbətlərdə narahatlıqlarını bildirirlər.
Tez-tez özünün süni intellekt vasitəsilə yaradılmış şəkillərini və videolarını paylaşdığı “Truth Social” platformasında yazan Tramp bildirib ki, süni intellekt üçün yeganə nəzarət və ya “təhlükəsizlik tədbiri” güclü və ağıllı prezidentdir və ABŞ-da məhz belə bir lider var. Administrasiyanın süni intellekt şirkətlərinin “pis və ya potensial olaraq pis işlər” görməsinin qarşısını artıq aldığını qeyd edən Tramp, həmçinin Amodeini “indi özünü mükəmməl bir mələk kimi aparmaqda” ittiham edib.
Tramp uzun müddətdir ki, süni intellektin faydalarını dəstəkləyir və bir çox sənaye liderləri onun prioritet layihələrinə, o cümlədən inauqurasiya fonduna və Ağ Evdə tikdirdiyi ziyafət zalına maliyyə töhfəsi veriblər.
Şayəstə
