Rusiya Müdafiə Nazirliyi bildirib ki, Ukraynanın Xerson vilayətində yerləşən Oleşki şəhərində humanitar yardım əməliyyatını həyata keçirmək məqsədilə Xerson istiqamətində müvəqqəti atəşkəs rejimi tətbiq olunub.
Elchi.az xəbər verir ki, Nazirlik yaydığı bəyanatda Xerson vilayətinin Oleşki şəhərindəki vəziyyətlə bağlı təfərrüatları açıqlayıb.
Bəyanatda qeyd olunur: “Xerson vilayətinin Oleşki yaşayış məntəqəsində humanitar yardım əməliyyatına hazırlıq çərçivəsində Rusiya Silahlı Qüvvələri Xerson istiqamətində atəşkəs rejimi tətbiq edib; rejim Moskva vaxtı ilə saat 04:00-dan etibarən qüvvəyə minib”.
Ötən həftə Rusiya Silahlı Qüvvələri Baş Qərargah rəisi Valeri Gerasimov bildirmişdi ki, Oleşki şəhərində humanitar əməliyyatın keçirilməsinə imkan yaratmaq üçün oktyabrın 27-dən etibarən Xerson istiqamətində müvəqqəti atəşkəs tətbiq olunacaq.
Dünən Rusiya Müdafiə Nazirliyi həmçinin Oleşki ətrafında minalardan təmizləmə işlərinin aparıldığını da açıqlamışdı.
Ukraynanın İnsan Hüquqları üzrə Müvəkkili (Ombudsman) Lubinets Oleşkidəki müvəqqəti atəşkəslə bağlı məlumat verib
Ukraynanın İnsan Hüquqları üzrə Müvəkkili Dmitri Lubinets bildirib ki, ölkəsi Rusiyanın qanunsuz şəkildə ilhaq etdiyi Xerson vilayətində yerləşən Oleşki şəhərində humanitar əməliyyatın həyata keçirilməsi üçün elan edilmiş atəşkəs rejiminə riayət edir.
Lubinets sosial şəbəkə hesabında paylaşdığı məlumatda təsdiqləyib ki, Xerson vilayətinin Oleşki şəhərində humanitar yardım fəaliyyətlərinin aparılmasına imkan yaratmaq məqsədilə atəşkəs rejimi qüvvəyə minib.
Atəşkəsin Kiyev vaxtı ilə saat 03:00-da başladığını qeyd edən Lubinets bildirib: “‘Sükut rejimi’ başlayıb; Ukrayna tərəfi əldə olunan razılaşmalara riayət edir”. Bölgədəki hadisələrlə bağlı ictimaiyyəti məlumatlandırmağa davam edəcəklərini vurğulayan Lubinets əlavə edib: “Bu proses, ABŞ Prezidenti Donald Trampın həyat yoldaşı Melaniya Trampın vasitəçiliyi və koordinasiyası ilə, Rusiya tərəfindən insan hüquqları üzrə yüksək səlahiyyətli nümayəndə Yana Lantratova ilə birlikdə həyata keçirdiyimiz humanitar yardım missiyası çərçivəsində baş tutur”.
Şayəstə
