Dekabrın 27-də Qafqaz Müsəlmanları İdarəsində (QMİ) Qazılar Şurasının üzvləri və İdarənin yerlərdəki səlahiyyətli nümayəndələrinin birgə toplantısı keçirilib.
İdarədən bildirilib ki, toplantıda Dini Qurumlarla iş üzrə Dövlət Komitəsinin rəsmiləri də iştirak edib.
QMİ sədrinin birinci müavini müfti Salman Musayev cari və gündəmdə olan məsələlərlə bağlı fikirlərini bölüşüb. Başa çatan il ərzində görülən işlər barədə məlumat verildi, aparılan dini maarifçilik fəaliyyəti, Dini Qurumlarla iş üzrə Dövlət Komitəsi ilə bərabər ölkədə və xaricdə keçirilən müştərək tədbirlərin nəticələri müzakirə olunub. Xüsusi vurgulanıb ki, il ərzində çap olunan moizələr kitabı, hər iki məzhəbə aid vahid təqvimin hazırlanması və ona riayət edilməsi istiqamətində birgə tədbirlər, bölgələrdəki qazilərə QMİ tərəfindən kompüterlərin paylanması, moizələrin mütəmadi şəkildə elektron poçt vasitəsilə onlara çatdırılması və digər bu kimi işlər təqdirəlayiqdir və bu yöndə fəaliyyət davam etdirilməlidir.
Toplantıda cəmiyyəti narahat edən bir sıra məsələlərə münasibət bildirilib. Bu xüsusda, erkən nikahlarla bağlı məsələ gündəmə çıxarılıb. Azyaşlı qızların ailə qurması kimi hallarla bağlı din xadimləri xüsusi vurğulayıblar ki, bu məsələyə dair Qafqaz Müsəlmanları İdarəsi Qazılar Şurasının 23 noyabr 2002-ci il tarixli Fətvası var. Fətvada deyilir ki, dini nikah mərasimi rəsmi dövlət qeydiyyatı idarələrində rəsmən qeydiyyat aparıldıqdan sonra icra edilə bilər. Bu o deməkdir ki, QMİ-nin rəsmi din xadimləri tərəfinfən yalnız dövlət tərəfindən qeydə alınmış nikah üçün dini nikah oxuna bilər. Bu qaydaya riayət etməyən QMİ rəsmi din xadimlərinə münasibətdə müvafiq cəza tədbirləri görüləcək.
Göstərilən Fətvada, həmçinin, ölkəmizin iqlim şəraiti nəzərə alınaraq Azərbaycanda evlənmək üçün yaş həddi həm oglanlar, həm də qızlar üçün 18 (müstəsna hallarda 17) yaş göstərilir ki, bu da dövlətimizin qanunlarına müvafiqdir. Bununla bağlı İdarənin Aparat rəhbəri Simran Həsənov ətraflı şərh verib.
Tədbirdə bildirilib ki, erkən nikahlar mənfi hallara gətirib çıxarır. Ailə quran insanların hüquqlarının təminatını dövlət öz üzərinə götürdüyünə görə din xadimləri yalnız mənəvi cəhətdən xeyir-dua verirlər. Toplantıda Qazılar Şurası üzvlərinə tapşırıq verildi ki, bu məsələlərdə daha ayıq-sayıq olsunlar və erkən nikahların qarşısının alınması kimi ictimai əhəmiyyətli mahiyyətini və QMİ-nin mövqeyini məscidlərdə və məclislərdə dindarlara daha fəal şəkildə çatdırsınlar.
Tədbirdə deputat Qüdrət Həsənquliyevin Qafqaz Müsəlmanları İdarəsinin sədri Şeyxülislam A. Paşazadənin və AR Dini qurumlarla iş üzrə Dövlət Komitəsinin sədri Mübariz Qurbanlının ünvanına mətbuat vasitəsilə etdiyi müraciətə münasibət bildirilib. Xüsusi vurğulanıb ki, İslam dinində elm öyrənilməsi hər zaman təqdir olunur. İslam dininə görə bilənlərlə bilməyənlər arasında fərq qoyulur və bu səbəbdən, hər bir müsəlman kişi və qadının təhsil alması, elm öyrənməsi vacib buyurulur. Bu gün kimsə din adından istifadə edərək övladlarının təhsil almasını əngəlləyirsə, məktəbdən uzaqlaşdırırsa, bu dinimizdə günah sayılır.
Bildirilib ki, qızların təhsili kimi əhəmiyyətli məsələnin həlli cəmiyyətin müxtəlif təbəqələrinin — ailə, məktəb institutlarının, dövlət qurumlarının, habelə din xadimlərinin birgə səyləri ilə mümkündür. Müfti Salman Musayev Quran ayələri və hədislərdən misal göstərərək dinimizdə elm, bilik əldə etməyə, təhsil almağa verilən önəmə diqqəti çəkib. O, bu məsələdə aidiyyatı olan bütün tərəfləri fəal olmağa çağırdı və din xadimlərinin, hər zaman olduğu kimi, bundan sonra da moizə və çıxışlarında bu məsələni geniş təbliğ etməsini, məsələni hər zaman diqqətdə saxlamağı vacib sayıb.
Dini qurumlarla iş üzrə Dövlət Komitəsinin sədr müavini Gündüz İsmayılov QMİ və Komitə rəsmilərinin iştirakı ilə belə səmərəli görüşlərin keçirilməsinin əhəmiyyətini xüsusi dəyərləndirib. QMİ və DK arasında əməkdaşlığın müsbət nəticələr verdiyini vurğulayan komitə rəsmisi din xadimlərinin tarixən ziyalıların tərkib hissəsi olduğuna diqqəti çəkib
Tədbirdə iştirak edən Mənəvi dəyərlərin Təbliği Fondunun icraçı direktoru Mehman İsmayılov çıxış edərək dövlət rəhbəri tərəfindən din xadimlərinə göstərilən maddi yardım-ianələrin qarşıdan gələn il də davam etdiriləcəyini bildirib.
Toplantıda qazılar və QMİ-nin səlahiyyətli nümayəndələrini, habelə Dini Komitənin bölgələrdəki nümayəndələrini maraqlandıran suallar cavablandırılıb.
Tədbirin sonunda QMİ və Komitə rəsmiləri, toplantı iştirakçıları tərəfindən deputat Qüdrət Həsənquliyevin önəmli sosial problemə göstərdiyi diqqət təqdirəlayiq hesab edilib və buna görə ona minnətdarlıq ifadə olunub.
Son şərhlər