Qətərin Baş naziri və Xarici İşlər naziri Məhəmməd bin Əbdülrəhman Əl Sani İsrailin Baş naziri Binyamin Netanyahunun “müharibə cinayətkarı” olduğunu bəyan edib və bildirib ki, regional mürəkkəbliklərə baxmayaraq, ölkəsi diplomatiyaya üstünlük verməyə və sülh naminə vasitəçilik rolunu oynamağa davam edəcək.
Elchi.az xəbər verir ki, Əl Sani bu fikirləri britaniyalı jurnalist Pirs Morqanın “Piers Morgan Uncensored” proqramına verdiyi müsahibədə səsləndirib.
Qəzza zolağında törədilən əməllərin müharibə cinayəti təşkil etdiyini və Netanyahunun buna görə məsuliyyət daşımalı olduğunu vurğulayan Al Sani qeyd edib ki, İsrailin Baş naziri Qətərə hücum etməklə ictimai rəyi manipulyasiya etməyə və reallıq barədə yanlış təsəvvür yaratmağa çalışır.
Netanyahunun özünün və hökumətinin hərəkətlərini təhlil etmək əvəzinə başqalarını günahlandırdığını bildirən Al Sani deyib: “Netanyahu müharibə cinayətkarıdır… O, öz hərəkətlərini başqalarına şamil etməyə çalışır.”
İsrailin ötən il Dohanı hədəf alan hücumunu bir daha pisləyən Al Tani vasitəçilərə hücumun təhlükəli presedent yaratdığını qeyd edərək, “Netanyahu qırmızı xətti keçib” deyə bildirib.
Regional böhranlar və İranla danışıqlar
Regional proseslərə toxunan Qətərin Baş naziri Al Sani xatırladıb ki, ölkəsi müharibənin nəticələri – təsiri İran və regiondan kənara çıxaraq qlobal iqtisadiyyatı təhdid edən nəticələr – barədə dəfələrlə xəbərdarlıq edib. ABŞ administrasiyası ilə koordinasiya şəraitində ABŞ və İran arasında razılığın əldə edilməsi üçün diplomatik həll yolları axtarışında “heç bir səyi əsirgəmədiklərini” vurğulayan Al Sani qeyd edib ki, vasitəçilik prosesi asan olmasa da, irəliləyiş əldə etmək üçün ən effektiv üsul “pərdəarxası diplomatiya”dır. Regional gərginliyi azaltmaq üçün üç əsas məsələnin həllinin vacibliyini vurğulayan Əl-Sani onları aşağıdakı kimi təsvir etdi:
“Birincisi, sanksiyaların ləğvi yolu ilə İranın dinc məqsədli nüvə enerjisi hüququnu təmin edərkən, eyni zamanda ABŞ tərəfini və Beynəlxalq Atom Enerjisi Agentliyini (BAEA) qane edən nüvə sazişinin əldə edilməsi. İkincisi, Hörmüz boğazında gəmiçilik azadlığının təmin edilməsi və bu məsələ ilə bağlı istənilən razılaşmanın beynəlxalq hüquq normalarına uyğunlaşdırılması. Üçüncüsü isə, regionda, o cümlədən İran və Körfəz Əməkdaşlıq Şurası (KƏŞ) ölkələrini əhatə edən təhlükəsizlik tədbirlərinin gücləndirilməsi.”
Şayəstə
