İyunun 20-də Azərbaycan Dövlət Akademik Musiqili Teatrında Xalq yazıçısı Kamal Abdullanın eyniadlı pyesi əsasında səhnələşdirilən “Gülçöhrə və Əsgər” tamaşası növbəti dəfə oynanılıb.
Elchi.az xəbər verir ki, teatrdan verilən məlumata görə, budəfəki nümayiş səhnə əsərinin quruluşçu rejissoru Prezident mükafatçısı, Əməkdar incəsənət xadimi Əsgər Əsgərovun 65 illik yubileyinə həsr olunub.
Alqışlarla qarşılanan tamaşanın sonunda rejissorun teatr sahəsində uzunillik səmərəli fəaliyyəti barədə söz açılıb, onun quruluşunda ərsəyə gələn səhnə əsərlərinin nəinki Azərbaycan teatrlarında, eləcə də ölkəmizin hüdudlarından uzaqlarda da maraqla qarşılandığı vurğulanıb.
Akademik Musiqili Teatrın rəhbərliyi və kollektivi adından Əsgər Əsgərova təbriklər çatdırılıb.
Gəncə Dövlət Milli Dram Teatrının quruluşçu rejissoru Elşad Əhmədli də yubilyarı təbrik edib. O, Əsgər Əsgərovu özünə ustad hesab etdiyini vurğulayaraq sənətkara yeni yaradıcılıq uğurları arzulayıb.
Qeyd edək ki, premyerası 2025-ci ilin 18 noyabrında olan “Gülçöhrə və Əsgər” tamaşasının bəstəkarı Əməkdar incəsənət xadimi Cavanşir Quliyev, rejissoru Elməddin Dadaşov, quruluşçu dirijoru Əməkdar incəsənət xadimi Fəxrəddin Atayev, quruluşçu rəssamı Vüsal Rəhim, quruluşçu baletmeysteri Əməkdar artist Nigar Şahmuradova, xormeysteri Əməkdar artist Vaqif Məstanov, konsertmeysteri Fidan Əliyeva, işıq üzrə rəssamı Rafael Vaqifoğlu, rejissor assistentləri Tamilla Aslanova və Çimnaz Bağırovadır.
Musiqili dramda Əməkdar artistlər Əzizağa Əzizov, İqrar Salamov, Almaz Ələsgərova, aktyorlar Səmədzadə Xasiyev, Mehriban Zaliyeva, Nicat Əli, Faiq Mirzəyev, Elnarə Nağdəliyeva, Elçin İmanov, İbrahim Əlizadə, Elxan İsmayılov, Nərmin Əliyeva, Əli Kərimov, Orxan Hüseynov, Kamil Cəfərov, Atilla Məmmədov, Nihat Həbibov, həmçinin xor və balet artistləri iştirak ediblər.
