Məlum olduğu kimi, sabiq milli təhlükəsizlik tutduğu vəzifədən kənarlaşdırıldıqdan sonra onun komandasında təmsil olunanların böyük əksəriyyəti istintaqa cəlb olundular.
Ləğv edilmiş MTN-in sabiq şefi və komandasının iş adamlarına, sahibkarlara divan tutması, təzyiq göstərməsi, fiziki və psixoloji üsullarla onları şantaj edərək külli miqdarda pul qoparması ilə bağlı dəfələrlə yazmışıq. Bəs vaxtilə işlədikləri MTN-i quldur yuvasına çevirən bu generalların hamısı istintaqa cəlb olunublarmı?
Belə məlum olur ki, yox. MTN-in rəhbərliyinə daxil olan və heç də Akif Çovdarovdan geri qalmayan, bəlkə də ondan daha amansız olanlardan elələri var ki, işdən qovulsalar da azadlıqdadır, məsuliyyətdən yayına biliblər. Belələrindən biri də MTN-in Baş İstintaq İdarəsinin rəisi olmuş general Mövlan Şıxəliyevdir.
İş adamlarının, sahibkarların fəaliyyətinə müdaxilə edib, onlardan pul qoparan, həbs etdirməklə hədələyən, həbs olunalara amansız, qeyri-insani işgəncələr verdirən general Mövlan Şıxəliyevin bu günə kimi istintaqa cəlb edilməməsinə səbəb nədir?
Virtualaz.org saytına daxil olan məlumata görə, M.Şıxəliyev sabiq nazirin ən yaxın adamlarından biri olub. O, tutduğu vəzifədən uzaqlaşdırılsa da, bu günə qədər həbs edilməyib. Mənbənin bildirdiyinı görə, M.Şıxəliyev həbs olunacağından ehtiyat edərək vaxtilə iş adamlarından, bəzi məmurlardan şantaj yolu ilə aldığı pulları geri qaytarmağa başlayıb.
MTN-in keçmiş zabiti, “Şərq-Qərb” Araşdırmalar Mərkəzinin rəhbəri Ərəstun Oruclu virtualaz.org saytına açıqlamasında generalın məsuliyyətə cəlb olunmamasının səbəblərini onun himayə olunmasında gördüyünü deyir: “Vaxtilə rəhbərlik etdiyi idarədə çoxsaylı cinayətlər edən şəxsin adı nədənsə mətbuat səhifələrində belə yer almır. Bu adamın adını iki dəfə mətbuatda mən çəkmişəm, başqa yazanlar da olub, amma dərhal da mövzu gündəmdən çıxıb gedib. Görünür kikimlərsə Mövlan Şıxəliyevin adının hallanmasında, istintaqa cəlb olunmasında, vaxtilə rəhbərlik etdiyi idarədəki cinayətlərin araşdırılmasında maraqlı deyil. Zənnimcə, söhbət sırf maddi maraqdan gedir, başqa heç nə ola bilməz”.
Ə.Oruclu bildirib ki, M.Şıxəliyev İstintaq Baş İdarəsinin rəisi olduğu dövrdə MTN-in şərləyib tutduğu, müxtəlif ittihamlarla, böhtan yolu ilə həbsə atdığı adamlara hüquqi don geyindirilməsi, leqallaşdırılması da məhz bu idarədə baş tutub: “Həmin idarədə onun tabeliyində olan istintaq təcridxanasında işgəncələrdən insanlar ölüb. Səid Dadaşbəylinin (“Səidin dəstəsi” işində həbs olunan və 2007-ci ildə MTN təcridxanasında işgəncələrə dözməyib ölən Emin Məmmədovu nəzərdə tutur -red.) işi buna sübutdur. Bundan əlavə, işgəncədən ölən şəxslərin ailə üzvləri o dərəcədə şantaj olunublar ki, qorxudan heç kəslə ünsiyyət qurmaq istəmirlər. Ad çəkmək istəmirəm, mən özüm iki ailə ilə ünsiyyət qurmağa çalışmışam, amma onlar qorxularından razılaşmayıblar. Əgər o insanlar danışsaydılar, mən digər faktlar da açıqlayardım. Hətta ailə üzvləri belə susursa, mən heç nə deyə bilmərəm”.
Keşmiş MTN zabiti adı çəkilən qurumda saysız-hesabsız cinayətlər törədildiyini, amma buna baxmayaraq, general Şıxəliyevin adının nəinki istintaqdan, hətta ictimai rəydən kənarda qaldığını deyir: “O idarədə saysız-hesabsız cinayətlər törədilib, ölüm halları baş verib. Bunlara baxmayaraq, Mövlan Şıxəliyevin adı heç yerdə hallanmır. Halbuki, o, birmənalı olaraq həbsdə olmalıdır. İş adamlarını pul almaq məqsədilə gətirəndə onları həmin idarədə saxlayıblar. Bunlar faktiki insanları girov götürüblər, buna görə cinayət işi açılmalıdır. Generalın vaxtilə rəhbərlik etdiyi qurumda baş vermiş işlərlə bağlı mütləq istintaq aparılmalıdır”.
Qeyd edək ki, çoxsaylı şikayətlər arasında ən çox MTN-də istintaqı aparılan şəxslər, bu qurum tərəfindən hədə-qorxu ilə var-dövlətlərini itirən iş adamlarının adları var. Bu şəxslərin illərlə susmasına səbəb MTN şefi Eldar Mahmudovun rəhbərlik etdiyi cinayətkar qrupun əməlləri olub. MTN-in vəzifəli şəxsləri tərəfindən hədələnənlər arasında qanunsuz olaraq istintaqları aparılan çoxsaylı məhkumlar var.
Bir müddət əvvəl dələduzluqda ittiham edilən, hazırda həbsdə olan iş adamı Rauf Kərimov Azərbaycan Beynəlxalq Bankının keçmiş rəhbəri Cahangir Hacıyev və onun tərəfdarları tərəfindən həbs olunması barədə ölkə başçısına müraciət ünvanlayıb. Müraciətdə şər-böhtanla hədələndiyini, Mövlan Şıxəliyev tərəfindən şantaj olunduğunu, həmin idarənin şöbə rəisi polkovnik Vüsal Ələkbərovun (həbs olunub – red.) ondan 1 milyon manat aldığı bildirilib. R.Kərimovun dediyinə görə, keçmiş MTN şefi ona məxsus “Çinar” kafesini hədə-qorxu gəlməklə şəxsən özü əlindən alıb.
M.Şıxəliyevin “Texnika Bank”ın Müşahidə Şurasının sədri Etibar Əliyevin yaxın dostu, tanınmış iş adamı Akif Qurbanovu təhdid edərək ondan 5 milyon tələb etməsi barədə mətbuatda kifayət qədər yazılıb. Hətta “Texnika Bank” işində zərərçəkənlər Hüseyn Səfərov, Nizami Kazımov, Xəqani Əzimov, Hamil Rzayev, Vüqar Behbudov, Füzuli Əzimov və digərləri MTN istintaqçılarının qanunsuz hərəkətləri ilə mənimsənilmiş pullarının özlərinə qaytarılmasını, Mövlan Şıxəliyevin də Vüsal Ələkbərov kimi həbs edilməsi ilə bağlı baş prokurora və ölkə başçısına müraciət ediblər.
Son şərhlər