Virtualaz.org saytı xəbər verir ki, baş nazir İranın bunu HƏMAS və “Hizbullah”ın köməyi ilə etdiyini deyib.

B.Netanyahu bildirib ki, “Allahın ordusu”, yəni “Hizbullah” silahlıları Qolan təpələrinin Suriyanın nəzarəti altında olan hissələrində cəmləşdirilir.

İndiyədək İran cənubdan HƏMAS-ın, şimaldan, Livan ərazisindən “Hizbullah”ın köməyi ilə İsrailə qarşı döyüşürdü. Lakin İsrailin “Allahın ordusu” ilə ayrıca haqq-hesabı var. Ərəb ölkələrinin ordularından fərqli olaraq “Hizbullah” indiyədək İsraillə müharibələrdə heç vaxt uduzmayıb, ən yaxşı halda “heç-heçə” ilə kifayətlənib.

Bu baxımdan İsrail baş nazirinin bəyanatı xüsusi maraq doğurur. B.Netanyahunun bildirdiyinə görə, İran minlərlə “Hizbullah” döyüşçüsünü Qolan təpələrində və Suriyanın digər cənub ərazilərində yerləşdirib.

Yaxın Şərq üzrə analitiklər deyirlər ki, İsrail baş nazirinin narahatlığı əbəs deyil. Hazırda İranla İsrail arasında birbaşa hərbi toqquşma fantastika kimi görünsə də “Hizbullah”ın yəhudi dövləti ilə yeni müharibəyə girməsi tamamilə mümkündür.

Üstəlik bu yaxınlarda “Hizbullah” və İsrail bir-birlərinə zərbələr endiriblər. İsrail aviasiyası yanvarın 18-də Qolan təpələrinə zərbə endirərək İranın İnqilab Keşikçiləri Korpusunun generalı Məhəmməd Əliulla Daudi və altı “Hizbullah” yaraqlısını öldürüb.

Buna cavab olaraq yanvarın 28-də “Hizbullah” İsrail patruluna hücum edib, iki əsgər öldürülüb, 7-si yaralanıb. İsrail ordusunun cavab zərbəsi isə BMT sülhməramlı qüvvələrinin əsgərinin həlak olmasına səbəb olub.

Lakin analitiklərin qənaətinə görə, hazırda Yaxın Şərqdə vəziyyətin olduqca qarışıq olması, İŞİD kimi qəddar terror təşkilatının şiələrin müqəddəs məkanlarını ələ keçirib dağıtmağa can atması “Hizbullah”ı İsraillə yeni irimiqyaslı müharibəyə birinci başlayan tərəf olmaqdan çəkindirir.

Eyni zamanda İsrail “Hizbullah”la müharibəni birinci başlamaqda maraqlı deyil, çünki bu təşkilatla müharibədə birmənalı hərbi qələbə əldə etməyə arxayın deyil.