Hantavirus hallarının aşkarlandığı və Madridə gətirilən MV Hondius gəmisindən təxliyə edilən 14 ispan sərnişindən birinin PCR vasitəsilə hantavirus testi müsbət çıxıb.
Elchi.az xəbər verir ki, İspaniya rəsmi xəbər agentliyi EFE-nin Səhiyyə Nazirliyindəki mənbələrə istinadən verdiyi məlumata görə, dünən Tenerifedən Madriddəki Gomez Ulla hərbi xəstəxanasına gətirilən 14 ispan sərnişin arasında bir nəfərin testi müsbət, 13-ünün isə hantavirus testi mənfi çıxıb. Nazirlik mənbələri testi müsbət çıxan sərnişinin heç bir simptomunun olmadığını, ümumi sağlamlığının yaxşı olduğunu və ilkin nəticəni təsdiqləmək və ya təkzib etmək üçün ikinci testin aparılacağını bildirib.
Protokola uyğun olaraq, testi mənfi çıxan digər 13 nəfərdən ayrılan şəxs xəstəxananın Yüksək Səviyyəli İzolyasiya və Müalicə Bölməsinə (UATAN) köçürülüb.
Əvvəllər iki nəfərin testi pozitiv çıxıb
Bu arada, Cadena Ser radiosuna danışan Səhiyyə nazirinin müavini Xavyer Padilla xəstə haqqında bir çox məlumat verməkdən yayınaraq, yalnız onun kişi olduğunu bildirib. Padilla izah etdi ki, şəxs simptomsuz olsa da, səhiyyə qrupu ilkin nümunə götürüldükdən dərhal sonra nəticələr barədə onlara məlumat verib və onlar heç bir fiziki təmas olmadan ciddi təhlükəsizlik tədbirləri altında UATAN-a köçürülüblər. “Biz onlara qayğı göstərəcəyik və mümkün olan ən yaxşı şəkildə müalicə edəcəyik”, – deyə Padilla bildirib və əlavə edib ki, bu şəxs də təcrid olunmuş digər şəxslər kimi psixoloji dəstək alır. Daha əvvəl Tenerifedəki Granadilla de Abona limanında iki gün qaldıqdan sonra Niderlandın Rotterdam şəhərinə yola düşən MV Hondius gəmisindən təxliyə edilən sərnişinlər arasında bir fransız və bir amerikalıda hantavirus aşkar edilmişdi. Gəmidə 27 heyət üzvü, Ümumdünya Səhiyyə Təşkilatından bir həkim və bir tibb bacısı var idi.
Şayəstə
