Aprel ayının sonunda qeydə alınan məlumatlara görə, dünyanın ən isti 50 şəhərinin hamısı Hindistanda yerləşir və mütəxəssislərin müasir tarixdə görünməmiş bir vəziyyət olduğunu vurğulayırlar.
Elchi.az xəbər verir ki, Dünya miqyasında hava keyfiyyətini və iqlim məlumatlarını izləyən AQI platformasının hesabatına görə, aprelin son günlərində qlobal miqyasda görünməmiş təbii hadisə baş verib. Planetin ən isti 50 yaşayış məntəqəsinin hamısı Hindistan sərhədləri daxilində qeydə alınıb.
Adətən ilin ən isti ayı olmayan aprel ayında Hindistanda orta pik temperatur 44,7 dərəcə Selsiyə çatıb. Siyahıda birinci yerdə olan Uttar Pradeş ştatının Banda şəhərində termometrlər 46,2 dərəcə Selsi göstərərək, həmin gün qeydə alınan ən yüksək temperatur üçün yeni rekord müəyyənləşdirib.
İstilik dözülməz həddə çata bilər
İqlim alimləri və tarixçilər bildirirlər ki, Hindistanın daxili hissəsində cəmləşən bu həddindən artıq isti dalğa aprel ayı üçün yüzlərlə rekord qırıb. Qlobal iqlim böhranı nəticəsində yayın daha tez başladığı və hər il daha şiddətləndiyi Hindistanda, 2050-ci ilə qədər temperaturun hətta sağlam insanlar üçün də “sağ qalma limitini” keçə biləcəyi barədə xəbərdarlıqlar var. Xüsusilə yaşlılar, uşaqlar və açıq hava işçiləri üçün həyati təhlükə yaradan bu vəziyyət, ölkənin kənd təsərrüfatı istehsalı və səhiyyə sisteminə də böyük təzyiq göstərir.
Artan temperaturla yanaşı, Hindistan bu il enerji böhranı ilə də mübarizə aparır. Yaxın Şərqdə neft tədarükünü məhdudlaşdıran müharibə, soyutma ehtiyaclarının ən yüksək həddə çatdığı bir vaxtda ölkəni yanacaqsız qoyub və qarşıdakı aylar üçün proqnozlar daha da pessimist bir mənzərə yaradır.
El-Ninyo hava fenomeni səbəbindən musson yağışlarının orta səviyyədən aşağı olacağı gözlənildiyi üçün, qəbul edilən temperaturun rütubətlə birlikdə mərkəzi və şərq ştatlarında 50-60 dərəcə Selsi təhlükəli səviyyələrə çatacağı proqnozlaşdırılır.
Şayəstə
