Fövqəladə Hallar Nazirliyinin (FHN) Dövlət Yanğın Nəzarəti və Dövlət Yanğından Mühafizə xidmətləri Bakı şəhəri, Səbail rayonunda yerləşən “Alov qüllələri” kompleksindəki “Fairmont Baku” otelində yanğın-taktiki təlim keçirib.
Elchi.az FHN-in saytına istinadən xəbər verir ki, təlimin keçirilməsində məqsəd oteldə baş verə biləcək yanğınlarla mübarizə üzrə şəxsi heyətin praktiki vərdişlərinin daha da təkmilləşdirilməsi, yanğından mühafizə bölmələrinin döyüş hazırlığının artırılması, habelə otel personalının yanğınlar zamanı ilkin davranış qaydaları barədə bilik və bacarıqlarının artırılması olub.
Təlim nəzəri və praktiki olmaqla iki hissədən ibarət olub.
Nəzəri hissədə FHN Dövlət Yanğın Nəzarəti Xidmətinin əməkdaşları tərəfindən otelin işçi heyətinə baş verə biləcək fövqəladə hal zamanı davranış qaydaları və atılacaq ilkin zəruri addımlar barədə maarifləndirici məlumatlar verilib, yanğınların söndürülməsi üsulları və ilkin yanğınsöndürmə vasitələrindən istifadə qaydaları ətraflı izah edilib. Həmçinin, mehmanxana və mehmanxana tipli obyektlərin yanğın təhlükəsizliyi qaydalarını təbliğ edən “Mehmanxanaların yanğın təhlükəsizliyi” adlı video-stend nümayiş etdirilib.
Təlimin praktiki hissəsində isə FHN Dövlət Yanğından Mühafizə Xidmətinin yanğınsöndürənləri tərəfindən oteldə şərti olaraq baş vermiş “yanğın” qısa müddətdə “söndürülüb”, “zərərçəkmişlərin” təxliyəsi həyata keçirilib.
Sonda təlimin nəticələri müzakirə olunub, müvafiq tapşırıqlar verilib, suallar cavablandırılıb.
Son şərhlər