Böyük Britaniya, ABŞ və Niderlanddan olan məlumatları təhlil edən beynəlxalq bir araşdırma, 50 yaşdan kiçik insanlar arasında müəyyən xərçəng növlərinə yoluxma hallarının sürətlə artdığını üzə çıxarıb. Mütəxəssislər piylənmə, qeyri-sağlam qidalanma, fiziki hərəkətsizlik və spirtli içki qəbulu kimi həyat tərzi amillərinin bu artıma səbəb ola biləcəyini qeyd edirlər.
Elchi.az xəbər verir ki, Böyük Britaniya, ABŞ və Niderlandda 50 yaşdan kiçik insanlar arasında müəyyən xərçəng növlərinə yoluxma halları sürətlə artır.
Ümumdünya Xərçəng Araşdırmaları Fondu (World Cancer Research Fund) tərəfindən aparılan araşdırmada bu üç ölkədən olan xərçəng statistikası təhlil edilib.
Böyük Britaniyada 2001-2023-cü illər ərzində 50 yaşdan kiçik insanlar arasında prostat vəzi xərçəngi halları təxminən dörd dəfə artıb.
Eyni dövrdə bağırsaq, böyrək və uşaqlıq xərçəngi hallarının sayı iki dəfədən çox artıb.
ABŞ-da 50 yaşdan kiçik insanlar arasında böyrək xərçəngi halları iki dəfədən çox artdığı halda, bağırsaq, uşaqlıq və mədəaltı vəzi xərçəngi hallarında 50 faizdən çox artım qeydə alınıb.
Niderlandda gənclər arasında bağırsaq, böyrək, qaraciyər və uşaqlıq boynu xərçəngi hallarında əhəmiyyətli artım müşahidə olunub.
Mütəxəssislər bildirirlər ki, piylənmə, qeyri-sağlam qidalanma, kifayət qədər fiziki aktivliyin olmaması, həmçinin spirtli içki və tütün məhsullarından istifadə ilə yanaşı, ətraf mühit amilləri də bu artımda rol oynaya bilər.
Tədqiqatçılar qeyd edirlər ki, xərçəngin əlamətləri barədə məlumatlılığın artması və erkən diaqnostika halların sayının çoxalmasına töhfə verib, lakin bu amillər artımı tam izah etmir. Digər tərəfdən, hər üç ölkədə 50 yaşdan kiçik insanlar arasında ağciyər xərçəngi hallarının azalması siqaret çəkmə göstəricilərinin düşməsi ilə əlaqələndirilir.
Mütəxəssislər gənclər arasında xərçəng hallarının artmasının səbəblərini daha yaxşı anlamaq üçün əlavə tədqiqatlara ehtiyac olduğunu vurğulayırlar.
Şayəstə
