Türkiyə prezidenti Rəcəb Tayyib Ərdoğan İstanbulda Türkiyə Gənclik Fondunun yay məktəbinin iştirakçıları qarşısında çıxış edərkən Qəzza zolağında baş verənləri son 100 ilin ən qəddar soyqırımı adlandırıb.
Elchi.az bu barədə “Trthaber”ə istinadən xəbər verir.
“Qəzzada əsl soyqırım baş verir – ötən əsrin ən qəddarlığı. Təkcə uşaqlara və körpələrə deyil, insani dəyərlərlə bağlı hər şeyə hücum edilir. Bütün bunlar bir ovuc cinayətkar tərəfindən məhv edilir”, – Türkiyə lideri bildirib.
O, həmçinin vurğulayıb ki, Ankara Qərb ölkələrinin ciddi təzyiqlərinə baxmayaraq, Fələstin anklavına və HƏMAS hərəkatına dəstəyindən əl çəkməyib. “İsrailin tanınması üçün Fələstin müqavimətinə (HƏMAS) böhtan atanlara, bunu terrorizm adlandıranlara baxmayaraq, biz qəhrəman Qəzzə xalqına arxa çevirməmişik.
Ərdoğan qeyd edib ki, Qəzzədəki qardaşlarımız şəhidlərin qanına bulanmış bu mübarək torpaqlarda azad və əbədi yaşayacaqlar: “Ümid edirəm ki, Suriyada olduğu kimi Qəzzada da zorakılığın sonunu görəcəyik. Biz bu günləri mütləq yaşayacağıq”.
Türkiyə prezidenti bundan əvvəl İtaliyanın baş naziri Giorgia Meloni və Liviya Milli Razılıq Hökumətinin rəhbəri Abdel Hamid Dbeibah ilə görüşdə vurğulamışdı ki, beynəlxalq ictimaiyyət təcili olaraq Qəzzada atəşkəsə nail olmalı və humanitar yardımın maneəsiz çatdırılmasını təmin etməlidir.
O, həmçinin Fələstin-İsrail münaqişəsinin həllinin yeganə yolunun 1967-ci il sərhədləri daxilində paytaxtı Şərqi Qüds olan müstəqil Fələstin dövlətinin yaradılması olduğunu təkrarlayıb.
Yeganə
