Devalvasiyadan sonra çap mediasının üzləşdiyi problemlər Milli Məclisin sonuncu iclasında da müzakirə mövzusu oldu. Bundan əvvəlki iclaslarda olduğu kimi, bu dəfə də parlamentarlar mətbuata güzəştlərin tətbiq edilməsi, çap xərclərinə tətbiq edilən ƏDV-nin ləğvi məsələsini qaldırdılar.
Deputat Araz Əlizadə mətbuatı ƏDV-dən azad etməyə çağırdı: “Cənab prezident dəfələrlə mətbuata bir neçə milyonluq güzəşt edib. Ancaq ƏDV ildə təqribən yüz mindən bir az artıq vəsait edir, faktiki olaraq qəpik-quruşdur. Nədir, bilərəkdən qəzetləri hakimiyyətin əleyhinə qaldırırlar? Bunu ora salmaq çox çətindir?”
Mətbuat Şurasının sədri Əflatun Amaşov da növbəti dəfə mətbuata tətbiq olunan ƏDV-ni qaldırmağa çağırdı: “Ölkədə reklamın olmadığı bir vaxtda, yanvar ayından çap məhsullarına ƏDV tətbiq olunur və bu, mətbuatın vəziyyətini daha da çətinləşdirir. Mən təklif edərdim ki, çap məhsulları da ƏDV-dən azad olunan məhsullar sırasına aid edilsin. Çünki Azərbaycan mətbuatı ordunun həyata keçirdiyi missiyanı hazırkı informasiya müharibəsi dövründə həyata keçirir. Ona görə də xahiş edirəm ki, mətbuatın durumunu yaxşılaşdırmaq üçün bu addım atılsın”.
Deputat Hikmət Babaoğlu da prezidentin mətbuata göstərdiyi diqqəti, KİVDF-nin yaradılmasını xatırlatdı və ƏDV-nin ləğvini istədi: “Amma keçən ilin dekabrındakı devalvasiyadan sonra çap mediasının vəziyyəti bir qədər ağırlaşıb. Biz bu gün peşəkar jurnalistlərin yetişməsini, xaricdə təcrübə keçməsini və bu sahədə vəziyyətin yaxşılaşmasını istəyirik. Ona görə də 164-cü maddəyə çap mediasına ƏDV-nin tətbiqinin ləğvi barədə əlavənin edilməsini xahiş edirəm”.
Parlament sədrinin birinci müavini Ziyafət Əsgərov mətbuata tətbiq olunan ƏDV-nin götürülməsi ilə bağlı təkliflərə reaksiya verdi: “Bu gün biz mətbuatla bağlı məsələni müzakirə etmirik. Amma əgər mətbuatla bağlı problemlər varsa, bu barədə təşəbbüslə çıxış etmək millət vəkillərinin hüququdur”.
Təkrar söz alan Araz Əlizadə isə dedi ki, mətbuata qayğı ilə bağlı cənab prezidentin zamanında çəkdiyi əziyyətləri bu gün yerə vururuq: “Biz Vergilər Məcəlləsinə bir cümləni əlavə etməklə bu məsələyə nöqtə qoya bilərik”.
Son şərhlər