Çempionlar Liqasının ikinci təsnifat mərhələsində sabah “Qarabağ”la cavab matçına çıxacaq “Rudar”ın hücumçusu İqor İvanoviç oyun öncəsi Qol.Az saytına müsahibə verib.
– Bakıda keçirilən ilk matçdakı nəticəni (0:0) sizin üçün sərfəli hesab etmək olar?
– “Qarabağ”la səfər matçımız maraqlı alındı. Onu deyə bilərəm ki, bu günə qədər meydana çıxdığım ən böyük oyunlardan biri idi. Stadionda çox gözəl ab-hava vardı. Elə bir azarkeş kütləsi qarşısında heç-heçə etmək bizi razı salmaya bilməz.
– İlk matça kimi “Qarabağ”ın çox güclü komanda olduğunu söyləyirdiniz. Sizcə, rəqibə qalib gəlməyə nə mane oldu?
– “Qarabağ” çox gözəl oyun sərgiləyən bir komandadır. Biz bunu bilirdik və meydanda da şahidi olduq. Komandanızın topla çox yaxşı rəftar edən və dəqiq ötürmələr edən futbolçuları var. Ancaq biz müdafiədə diqqətli oynadıq. Bakıda bizim üçün bəlkə də ən yaxşı nəticəni qazandıq.
Biz müdafiə olunmağa məcbur idik. Çünki “Qarabağ” kimi güclü komanda ilə ilk matçdan lazım olan nəticəni qazanmalıydıq. Sevinirəm ki, buna nail olduq.
– Monteneqrodakı cavab matçında da müdafiə futbolu oynayacaqsınız?
– Yox. Doğma meydanda bizə qol vurmaq lazımdır. Amma yenə də ehtiyatlı oyuna üstünlük verəcəyik. Bacardığımız qədər səhv etməməyə çalışacağıq. Bakıdakından da biraz sərt oyun sərgiləyəcəyik.
– Bəs, “Qarabağ”ın necə oyun sərgiləyəcəyini gözləyirsiniz?
– Hər zaman qeyd etdiyim kimi, “Qarabağ” çox yaxşı komandadır. Onların güclü futbolçuları, baş məşqçiləri və böyük tamaşaçı kütləsi var. “Qarabağ” bizimlə qapalı futbol oynayacağına inanmıram. Onlar daha çox hücuma atılacaq və qol vurmağa çalışacaqlar. Çünki səfərdə vurulan qol “Qarabağ” üçün çox əhəmiyyətlidir.
– Səncə, cavab matçının favoriti kimdir?
– Sözsüz ki, “Qarabağ” hələ də favoritdir. Onların növbəti mərhələyə keçmək üçün yaxşı şansları var. Amma bizim də şansımız bitdiyini demək olmaz.
– Bakıda qazanılan bərabərlik cavab matçı üçün üstünlüyünüz sayıla bilər?
– Düşünürəm ki, bu, “Qarabağ” kimi komandaya qarşı üstünlük deyil. Çünki onlar cavab matçında bir qol vursa, biz iki cavab qolu vurmağa məcburuq ki, bu da bizim üçün çox çətin olacaq.
– İlk matçda “Rudar”ın müdafə xətti daha çox Reynaldonu zərərsizləşdirmlə məşğul idi.
– Biz bilirdik ki, Reynaldo “Qarabağ”ın ən yaxşı futbolçusudur. Ona görə də bu futbolçuya qarşı diqqətli olmalı idik. Amma Reynaldonun özü də keyfiyyətli oyun göstərə bilmədi. Bununla belə, bir neçə epizodda bizim üçün təhlükə yaratdı.
– “Qarabağ”- “Rudar” cütünün qalibi böyük ehtimalla Şontlandiyanın “Seltik” klubu ilə qarşılaşacaq.
– “Seltik” Çempionlar Liqasında təcrübəsi olan böyük bir klubdur. Onların fanatları da Avropada ən yaxşılardan biridir. Onların arenasında futbol oynamaq çətindir. Düşünürəm ki, növbəti mərhələyə kim keçsə, onu çox çətin oyun gözləyir. Biz ilk növbədə “Qarabağ”dan üstün olmağa çalışacağıq. Ona görə də bu dəqiqə “Qarabağa”a qol vurub qələbə qazanmaq haqqında düşünürük. Növbəti mərhələyə keçə bilsək, “Seltik” haqqında danışarıq.
Son şərhlər