Avropa Birliyi Rəqəmsal Bazarlar Aktını (DMA) pozduğuna görə “Google”-a rekord məbləğdə cərimə tətbiq etməyə yaxındır.
Elchi.az xəbər verir ki, bu barədə Almaniyanın “Handelsblatt” qəzeti Avropa Komissiyasındakı (AK) mənbələrə istinadən yazır ki, pozuntu ilə bağlı təhqiqat son mərhələyə qədəm qoyur.
“Aİ “Google”-a rəqəmsal qanunları pozduğuna görə rekord məbləğdə cərimə tətbiq etməyə yaxındır. Amerika şirkətinə qarşı istintaq son mərhələdədir”,-deyə nəşr qeyd edir
Cərimə hələ rəsmi olaraq açıqlanmayıb, lakin onun şirkətin dövriyyəsi əsasında hesablandığı məlumdur. Mənbələrin bildirdiyinə görə, rəsmilər “Google”-u bir neçə yüz milyon avro cərimələmək niyyətindədirlər, yekun qərar isə AK prezidenti Ursula fon der Leyenin öhdəsindədir.
Qəzet xatırladıb ki, Brüssel “Google” və onun ana şirkəti “Alphabet”-i axtarış nəticələrində rəqiblərinin zərərinə öz xidmətlərini tanıtmaqda ittiham edir. Aİ-nin tələblərindən sonra şirkət artıq daha görkəmli mövqelərdə rəqiblərin xidmətlərini nümayiş etdirməyə başlayıb, lakin Avropa Komissiyası bunun qeyri-kafi olduğuna əmindir.
Brüssel hesab edir ki, “Google” öz süni intellekt məhsullarını tanıtmaq üçün öz dominant axtarış mühərriki mövqeyindən istifadə edir və bununla da rəqabəti pozur.
“Google”, öz növbəsində, tənzimləyicilərlə əməkdaşlığa hazır olduğunu təsdiqləsə də, ona qarşı irəli sürülən tələblərin bir neçəsini əks məhsuldar adlandırıb. Şirkət hesab edir ki, artıq edilən dəyişikliklər avropalılar üçün istifadəçi təcrübəsini pisləşdirib.
Nəşrin fikrincə, potensial cərimə Avropa İttifaqı ilə ABŞ arasında münasibətlərdə gərginliyi artıra bilər. ABŞ prezidenti Donald Tramp dəfələrlə Amerika texnologiya şirkətlərinə qarşı Avropa sanksiyalarını tənqid edib və bunları ticarət məhdudiyyətlərinin bir forması kimi qiymətləndirdiyini bildirib.
Yeganə
