Pentaqon, ABŞ-ın hərbi arsenalındakı boşluğu aradan qaldırmaq məqsədilə kiçik zərbə PUA-larının satın alınması üçün startaplar və kiçik şirkətlər arasında 18 aylıq “Drone Dominance” (Dron Üstünlüyü) müsabiqəsi elan edib.
Elchi.az xəbər verir ki, bu barədə “The Washington Post” (WP) qəzeti məlumat yayıb.
Nəşrin məlumatına görə, qalib gələn şirkətlə 1,1 milyard dollar dəyərində müdafiə müqavilələri bağlanacaq ki, bu da hərbi idarənin ümid etdiyi kimi, təxminən 300 min kiçik PUA almağa imkan verəcək. Bu yarışın liderləri arasında Britaniyanın “Skycutter” və dron yarışları üzrə 23 yaşlı keçmiş dünya çempionu Soren Monro-Anderson tərəfindən təsis edilmiş Amerikanın “Neros” şirkəti var.
Nəşrdə qeyd olunur ki, iştirakçıların müxtəlifliyi Pentaqonun ənənəvi silah satınalma kanallarını genişləndirməyə yönəlmiş planının tərkib hissələrindən biridir. ABŞ rəhbərliyi yeni növ hərbi texnikanın hazırlanması üçün getdikcə daha çox özəl sahibkarlara müraciət edir və ənənəvi olaraq bir neçə böyük oyunçuya üstünlük verilən şişirdilmiş müqavilələrdən qaçaraq, ən perspektivli məhsullara vəsait yatırmağa hazırdır.
Pentaqonun müdafiə innovasiyaları bölməsinin rəhbər müavini Trevis Mets yeni podratçıların tapılması məsələsində “çox optimist” olduğunu bildirib. Bu halda nazirliyin “tədqiqat və təkmilləşdirmə işlərini (Ar-Ge) maliyyələşdirməsinə ehtiyac qalmır”, — deyə Mets qeyd edib.
WP-nin məlumatına görə, ABŞ-ın 2027-ci il üçün hərbi büdcə layihəsi pilotsuz uçuş aparatlarının tətbiqi ilə döyüş əməliyyatlarının aparılması üçün əhəmiyyətli dərəcədə genişləndirilmiş bölmənin maliyyələşdirilməsinə 54,6 milyard dollar ayrılmasını nəzərdə tutur.
Məryəm
