“Azərbaycanım” beynəlxalq jurnalı redaksiyasında tanınmış soydaşımız, “Muay tay” döyüş üslubu ilə dünyada şöhrət qazanmış UFC döyüşçüsü Rafael Fizievə “Azərbaycanın Qüruru” ordeni təqdim olunub.
Görüşdə jurnalın baş redaktoru, Beynəlxalq Elmlər Akademiyasının akademiki Emil Nəsirli nəşrin fəaliyyət istiqamətləri, yerli və beynəlxalq təşkilatlarla informasiya mübadiləsi və qazandığı uğurlardan danışıb. E.Nəsirli nəşrin Redaksiya Şurasının qərarı ilə beynəlxalq aləmdə Azərbaycanı şərəflə təmsil edərək idman sahəsində peşəkar fəaliyyətinə və idmanın inkişafında xidmətlərinə görə UFC döyüşçüsü Rafael Fizievin “Azərbaycanım” beynəlxalq jurnalının təsis etdiyi “Azərbaycanın Qüruru” ordeninə layiq görüldüyünü bildirib və mükafatı tanınmış idmançı soydaşımıza təqdim edib.
Baş redaktor bildirib ki, ölkəmizin çap mediasında özünəməxsus dəst-xəti ilə seçilən “Azərbaycanım” beynəlxalq jurnalı 22 ilə yaxındır maraqlı, məzmunlu yazıları ilə oxucularının görüşünə gəlir. Jurnalın kollektivi Azərbaycanın haqq səsinin dünya oxucusuna çatdırılması üçün layiqincə çalışıb, bu istiqamətdə böyük səylər göstərib. Sonra baş redaktor xüsusi qeyd edib ki, Azərbaycan hazırda idmanın inkişaf səviyyəsinə görə dünyada aparıcı ölkələrdən biri kimi tanınır. 1997-ci ildə İlham Əliyevin Milli Olimpiya Komitəsinin prezidenti seçilməsindən sonra ölkəmizdə Olimpiya hərəkatı, bədən tərbiyəsi və idmanın inkişafı yeni mərhələyə qədəm qoydu. Azərbaycanın beynəlxalq Olimpiya hərəkatına fəal qoşulması sayəsində ölkəmiz böyük idman potensialına malik olduğunu nümayiş etdirdi. “İdman sahəsində qazanılan nailiyyətlər, həm də dövlətin ümumi inkişaf səviyyəsini, iqtisadi potensialını müəyyənləşdirən vacib meyarlardan biri hesab olunur. Azərbaycanın mötəbər Beynəlxalq idman yarışlarına və irimiqyaslı tədbirlərə ev sahibliyi etməsi, eləcə də beynəlxalq yarışlarda idmançılarımızın əldə etdiyi uğurlar ölkəmizin bu sahədə formalaşdırdığı dövlət siyasətinin effektivliyini göstərir. Ümumiyyətlə, ölkəmizdə idmanın inkişafı istiqamətində görülən işlər davamlı xarakter daşıyır. Bu amil qarşıdakı dövrdə də mühüm nailiyyətlər qazanılacağını deməyə tam əsas verir”, – deyə Emil Nəsirli vurğulayıb.Görüşdə mətbuatımızın böyük tərəqqi yolu keçdiyini qeyd edən E.Nəsirli vurğulayıb ki, ölkəmizdə kütləvi informasiya vasitələrinin inkişafı istiqamətində atılan addımlar Azərbaycan mediasının inkişafına mühüm töhfələr verib. Bu gün mətbuata xüsusi dövlət qayğısı və diqqətinin göstərilməsi, eyni zamanda, söz, fikir və özünüifadə azadlıqlarının ən yüksək səviyyədə təsbit edilməsi, mətbuatın maddi-texniki və maliyyə bazasının gücləndirilməsi, media nümayəndələrinin səmərəli fəaliyyəti üçün əlverişli şəraitin yaradılması və digər amillər milli mətbuatımızın inkişafını şərtləndirib.
Tanınmış soydaşımız, Muay tay döyüş üslubu ilə dünyada şöhrət qazanmış UFC döyüşçüsü Rafael Fiziev “Azərbaycanım” beynəlxalq jurnalında yayımlanan rəngarəng materialları böyük maraqla izlədiklərini bildirib və redaksiya şurasının qərarı ilə “Azərbaycanın Qüruru” ordeninə layiq görüldüyü üçün jurnalın Redaksiya Şurasının üzvlərinə təşəkkür edib. Rafael Fiziev “Azərbaycanım” beynəlxalq jurnalının bütün kollektivini təbrik edib, gələcək fəaliyyətlərində yeni uğurlar arzulayıb. “İdman uğurları Azərbaycanın ümumi inkişafının mühüm göstəricilərindən biridir. Əldə edilən hər bir nailiyyət Azərbaycan xalqının gücünün və məqsədyönlü fəaliyyətinin nəticəsidir. Bu danılmaz həqiqət və təsdiq olunmuş bir faktdır ki, Azərbaycan idmançılarının qələbə soraqları tez-tez dünya, Avropa çempionatlarından, beynəlxalq turnirlərdən, Olimpiya Oyunlarından gəlir və Azərbaycan bu sahədə inkişafa görə nəinki keçmiş SSRİ respublikalarının, hətta əksər Avropa dövlətlərini geridə qoyur.” – deyə Rafael Fiziev bildirib.
Sonra Rafael Fiziev redaksiyanın baş ofisində “Azərbaycanım” beynəlxalq jurnalının ötən illər ərzində fəaliyyətini əks etdirən fotostendlə tanış olub.
Daha sonra Rafael Fiziev “Azərbaycanım” beynəlxalq jurnalının redaksiyasının 2026-cı ildə qonağı kimi nəşrin “Fəxri xatirə kitabı”na ilk ürək sözlərini yazıb.
