6 may 2022-ci il tarixində Azərbaycan Respublikasının Xarici İşlər Nazirliyində Azərbaycan Respublikası və İtaliya Respublikası arasında diplomatik münasibətlərin qurulmasının 30-cu ildönümü münasibətilə tədbir və sərgi keçirilib.
XİN-dən Elchi.az-a verilən xəbərə görə, tədbirdə AR XİN-in rəhbər heyəti, İtaliyanın Azərbaycan Respublikasındakı səfiri, habelə səfirliyin əməkdaşları iştirak edib.
Tədbir hər iki ölkənin dövlət himnlərinin səslənməsi ilə başlayıb.
Tədbirdə çıxış edən Azərbaycan Respublikasının xarici işlər nazirinin müavini Xələf Xələfov Azərbaycan və İtaliya arasında əlaqələrin tarixi köklərə və dostluq ənənələrinə əsaslandığını və son 30 ildə münasibətlərin bütün istiqamətlər üzrə dinamik inkişaf etdiyini bildirib.
Nazir müavini iki ölkə arasında siyasi, iqtisadi, ticarət, energetika, humanitar və digər sahələrdə çoxölçülü strateji tərəfdaşlıq əlaqələrinin mövcud olduğunu vurğulayıb. X. Xələfov 44 günlük Vətən müharibəsi zamanı İtaliyanın beynəlxalq hüquqa əsaslanan və ədalətli mövqeyini məmnunluqla qeyd edib. Sonda nazir müavini əlamətdar gün münasibətilə təbriklərini çatdırıb, hər iki xalqa sülh, əmin-amanlıq və firavanlıq arzulayıb.
Daha sonra çıxış edən İtaliyanın Azərbaycan Respublikasındakı səfiri Klaudio Taffuri 30 il ərzində Azərbaycan və İtaliya arasında əlaqələrin inkişafında əldə olunan nailiyyətləri qürurla qeyd edərək, tədbir iştirakçılarını bu əlamətdar tarix münasibəti ilə təbrik edib. Səfir, Azərbaycan və İtaliya arasında bir çox istiqamətlər üzrə mövcud olan yüksək səciyyəli əməkdaşlığı məmnunluqla qeyd edib. Eyni zamanda, səfir iki ölkə arasında insanlar arasında əlaqələrin intensivləşməsinə istinad edib, xüsusilə də təhsil sahəsində əməkdaşlığın genişlənməsini məmnunluqla vurğulayıb.
Tədbirin sonunda iştirakçılar Azərbaycan və İtaliya arasında diplomatik münasibətlərin 30 illiyinə həsr edilmiş fotosərgi ilə tanış olublar.
***
12:19
Xarici İşlər Nazirliyində Azərbaycan və İtaliya arasında diplomatik münasibətlərin qurulmasının 30 illiyinə həsr olunmuş tədbir keçirilir.
Elchi.az xəbər verir ki, bu barədə Azərbaycan Xarici İşlər Nazirliyi tviterdə məlumat yayıb.
Qeyd edək ki, İtaliya Azərbaycanın müstəqilliyini 1992-ci il yanvarın 1-də tanıyıb. İki ölkə arasında əlaqələr Azərbaycan Xalq Cümhuriyyəti dövründə də olub. Belə ki, Bakıda İtaliyanın Enriko Ensomun rəhbərlik etdiyi nümayəndəliyi olub.
Azərbaycanın müstəqilliyini bərpa etməsindən sonra iki ölkə arasında diplomatik münasibətlər bərpa edilib. 1997-ci ilin mart ayında İtaliyanın Azərbaycanda, 2003-cü ilin dekabr ayında isə Azərbaycanın İtaliyada səfirliyi təsis edilib. Bundan başqa, Milli Məclisdə Azərbaycan-İtaliya parlamentlərarası əlaqələr üzrə işçi qrupu fəaliyyət göstərir.
Son şərhlər