Elçibəy hər kəs üçün milli dəyərdir
Bu gün Azərbaycan milli azadlıq hərəkatının lideri, görkəmli dövlət xadimi, sabiq prezident Əbülfəz Elçibəyin doğum günüdür. Xatırladaq ki, Ə. Əliyev (Elçibəy) 1938-ci il iyunun 24-də Ordubad rayonunun Kələki kəndində anadan olub. 1975-1976-cı illərdə siyasi fəaliyyətinə görə həbsdə olub. 1988-ci ildə Azərbaycanda başlayan milli azadlıq hərəkatının liderlərindən biri, Azərbaycan Xalq Cəbhəsini(AXCP) yaradanlardan olub. 1992-ci il iyunun 7-də prezident seçilən Əbülfəz Elçibəy bir il sonra Gəncədə başlayan hərbi qiyamdan sonra Bakını tərk edib. 1993-cü il iyunun 17-də doğulduğu Ordubad rayonunun Kələki kəndinə gedib. Uzun sürən ağır xəstəlikdən sonra 2000-ci ilin avqustun 22-də Türkiyənin Ankara Dövlət Xəstəxanasında dünyasını dəyişib və nəşi Bakıya gətirilərək Fəxri xiyabanda dəfn edilib.
Ə.Elçibəyin Azərbaycan üçün xidmətlərini nəzərə alıb, partiya sədrləri və millət vəkilləri arasında ” Əbülfəz Elçibəy kimdir” sualı ilə sorğu keçirdik.
Klassik xalq Cəbhəsi partiyasının sədri Mirmahmud MİRƏLİOĞLU AİM.az -a açıqlamasında Ə.Elçibəyi milli dəyər adlandırdı:
“Elçibəy elə bir irs qoyub, gedib ki, bu irs onu millətin dəyərinə çevirib. Elçibəy hər kəs üçün milli dəyərdir. Fəaliyyətini qiymətləndirməyənlər belə, çətin məqamlarda onu qəbul etmək zorundadırlar”.
Müəllimim, liderim, dostum Əbülfəz bəyin doğum günündə onu rəhmətlə anıram. 24 iyun, həm də dəyərli Azərbaycan aydını mərhum Nəcəf Nəcəfovun doğum günüdür. Allah hər ikisinin ruhunu şad etsin…
Böyük Quruluş Partiyasının başkanı millət vəkli Fazil MUSTAFA isə qeyd etdi ki, tarixi şəxsiyyətlərin qiymətləndirilməsində hansısa standartlar olmur:
“Sevən də, sevməyən də, dəyər verən də, dəyərsizləşdirən də olur və hər zaman olacaq. Ancaq elə bir obrazlar var ki, mən onları “öz şəxsiyyətində Azərbaycanı daşıya biləcək adamlar” adlandırıram. Məsələn, hər zaman Məhəmməd Əmin Rəsulzadəni bir obraz olaraq təsvir etmək istəyəndə niyəsə “Yürüyən Azərbaycan” ifadəsi ağlımdan keçir. Sanki o yerişiylə, yazısıyla, mövcudluğu ilə özündə bir Azərbaycan daşıyır. Müasir dövrdə də bu obraza yaxın şəxsiyyətlərdən biri, heç şübhəsiz, Əbülfəz Elçibəydir. Onun prezidentliyini, idarəetmə anlayışını, fikir və görüşlərini dartışa bilərsiniz, nəyisə doğru və ya yanlış hesab edə bilərsiniz, ancaq obraz olaraq əminəm ki, o, “Azərbaycanı öz şəxsiyyətində daşıyan insan” kimi yaddaşlarda qalıb. Müəllimim, liderim, dostum Əbülfəz bəyin doğum günündə onu rəhmətlə anıram. 24 iyun həm də dəyərli Azərbaycan aydını mərhum Nəcəf Nəcəfovun doğum günüdür. Allah hər ikisinin də ruhunu şad etsin”.
Həyatını Azərbaycanın azadlığına həsr etmiş şəxsiyyət
Azərbaycan Demokratik İslahatlar Partiyasınınsədri, millət vəkili Asim Mollazdə söylədi ki, Elçibəy vətənini, millətini sevən şəxsiyyət idi:
“Allah ona rəhmət eləsin. Milli Azadlıq hərəkatının lideri idi. Həyatını Azərbaycanın azadlığına həsr etmiş şəxsiyyətdir”.
Millət vəkili Elman Məmmədov isə Ə. Elçibəyi bu cür qiymətləndirib:
“Ə.Elçibəylə şəxsi tanışlığım da olub. 1990-cı ildə Ə.Elçibəy Xocalıya gəlmişdi. Başqa yerlərdə olduğu kimi Xocalıda da AXCP-nın yerli təşkilatını yaratmaq istəyirdi. Bu baş tutmadı. O prezident olan dövrdə mən icra başçısı idim. Tanışlığımız belə olub. Elçibəy ilk növbədə Azərbaycanda 1988-ci ildən başlanan xalq hərəkatının lideri kimi tanınıb. Təmasımız az olduğu üçün onun şəxsiyyətini dəyərləndirmək iqtidarında deyiləm. Ancaq deyə bilərəm ki, onun prezidentlik dövrü Azərbaycanın ən çox zərbə aldığı, ölkəmizdə qanunsuzluğun, anarxiyanın baş verdiyi və dövlətçiliyin çox zəif olduğu bir dövrü kimi xarakterizə oluna bilər. Buna görə Elçibəyi xalq hərəkatının lideri kimi müsbət dəyərləndirirəm. Lakin prezident kimi onu çox zəif bir ölkə baçısı hesab edirəm”.
AİM.Az
Son şərhlər