Qüdrət Həsənquliyev: “Xalqımızı Yeni il münasibətilə təbrik edir, böyük dəyişikliklər üçün fədakarlıq etməyə çağırıram”
2023-cü il müstəqillik illərinin ən möhtəşəm qələbəsini qazandığımız və yaşadığımız il kimi tariximizdə qalacaq.
Bu sözləri “Xalq cəbhəsi” (www.xalqcebhesi.az) saytına açıqlamasında Bütöv Azərbaycan Xalq Cəbhəsi Partiyasının (BAXCP) sədri, millət vəkili Qüdrət Həsənquliyev deyib.
BAXCP sədri qeyd edib ki, 2023-cü ildə iqtisadiyyatımızın böyüməsində cüzi artım olsa da İlham Əliyev Azərbaycan Respublikası Silahlı Qüvvələrinin Ali Baş Komandanı kimi Heydər Əliyevin 100 illiyində xalqımıza qürurverici bir qələbə qazandırdı: “İctimai və dövlət həyatımızın digər sahələrində öyünə biləcəyimiz uğurlara imza ata bilməsək də Qarabağ üzərində dövlət suverenliyinin bərpasına imkan yaradan ,qanlı separatizmə və erməni faşizminə son qoyan möhtəşəm qələbə 2023-cü ili tariximizə qızıl hərflərlə yazdı.
Prezident 2024-cü ili COP 29-un Bakıda keçirilməsinə görə, ekologiya ili elan etsə də mən, 2024-cü ilin Ermənistanla sülh sazişinin imzalandığı böyük dəyişikliklər ili olmasını arzulayardım. Xalqımızı Yeni il münasibətilə təbrik edirəm və böyük dəyişikliklər üçün fədakarlıq etməyə çağırıram. Çünki dövlətimizin və xalqımızın sülhə, həyatımızı yaxşıya doğru dəyişəcək ciddi islahatlara böyük ehtiyacı var. Mərhum prezident Heydər Əliyevin aforizmə çevrilmiş bir fikri var: “İqtisadiyyatı güclü olan dövlət hər şeyə qadirdir”. Güclü iqtisadiyyat olmadan ekoloji problemləri də çözmək mümükün olmayacaq. Köklü konstitusion islahatlar aparmadan, yəni fraksiyaların olduğu güclü parlament və qanunun aliliyini təmin edəcək, mülkiyyəti qoruyacaq müstəqil məhkəmə hakimiyyəti formalaşdırmadan nə problemlərimizin həllinin açarı olan rəqabətədavamlı azad bazar iqtisadiyyatı qura, nə sosial problemlərin öhdəsindən gələ,nə də bizi təhdid edən çağırışlara layiqincə cavab verə biləcəyik”.