Azərbaycanla Çin günəş və külək enerjisi sahəsində bir sıra layihələr üzrə əməkdaşlıq edir.
Elchi.az xəbər verir ki, bunu Çinin Azərbaycandakı səfiri Lu Mey Çin Xalq Respublikasının yaranmasının 77-ci ildönümünün qeyd olunması münasibətilə keçirilən tədbirdəki çıxışında deyib.
Səfir bildirib ki, Azərbaycanla enerji sahəsində əməkdaşlıq ölkələrin ikitərəfli münasibətlərinin mühüm istiqamətlərindən biridir.
Səfirin sözlərinə görə, qarşılıqlı faydalı əməkdaşlıq vasitəsilə əsl multilateralizmi birgə müdafiə etmək və həyata keçirmək, eləcə də ümumi maraqları qorumaq lazımdır.
Lu Mey qeyd edib ki, Çin çoxtərəfli əməkdaşlığın tərəfdarıdır. O bildirib ki, Çin Xalq Respublikasının Sədri Si Cinpin bəşəriyyətin ortaq taleyi icmasının qurulması konsepsiyasını, habelə inkişaf, təhlükəsizlik, sivilizasiya və idarəçilik sahələrində dörd qlobal təşəbbüsü irəli sürüb.
Səfir Qlobal İnkişaf Təşəbbüsünün (GDI) çərçivəsində görülən işlərə də toxunub. Onun sözlərinə görə, təşəbbüsün beş illiyi tamam olur və bu çərçivədə 23 milyard ABŞ dollarından çox vəsait səfərbər edilib, 70-dən çox ölkədə 2 000-dən artıq əməkdaşlıq layihəsi həyata keçirilib. Nəticədə dünyada 40 milyon insan bu təşəbbüsdən faydalanıb.
Lu Mey həmçinin bildirib ki, ötən il Çin Xalq Respublikasının Sədri Si Cinpin Qlobal İdarəçilik Təşəbbüsünü (GGI) irəli sürüb və qlobal idarəçiliyin təkmilləşdirilməsi üçün doqquz əsas prioritet müəyyən edib.
Səfir süni intellektin idarə edilməsi sahəsində də Çinin təşəbbüslərindən danışıb. O qeyd edib ki, Çin Süni İntellektin İdarə Edilməsi üzrə Qlobal Təşəbbüsün irəli sürülməsində liderlik edib.
Lu Meyin sözlərinə görə, cari ilin iyul ayında Çinin təşəbbüsü ilə Şanxay şəhərində Süni İntellekt Sahəsində Əməkdaşlıq üzrə Ümumdünya Təşkilatı (WAICO) yaradılıb. O bildirib ki, bu, süni intellektin idarə edilməsi üzrə ilk beynəlxalq təşkilatdır.
