Məlum olduğu kimi, yanvarın 22-də gecə saat 12:00 radələrində Xaçmaz şəhərindəki Bazardüzü ticarət mərkəzində yanğın baş verib. Verilən məlumata görə, hadisə Rübail Cəfərov adlı vətəndaşa məxsus ticarət obyektində meydana gəlib.
Yanğın zamanı içərisində satış üçün nəzərdə tutulan mallarla yanaşı, mağazanın 160 kv.m sahəsi də yanaraq yararsız hala düşüb. Vətəndaşın sözlərinə görə, ilkin hesablamalara əsasən 25 min manat dəyərində ziyana düşüb. Savash.org-un məlumatına görə, Rübail Cəfərov baş verən hadisənin qəsdən hər hansısa şəxs və ya şəxslər tərəfindən törədildiyini də bildirib. Çünki vətəndaşın digər iki obyektinin isə şüşələri sındırılıb.
Hadisədə maraqlı cəhəti isə budur ki, yanğın sadəcə həmin vətəndaşın mağazasında baş verib və yaxınlıqdakı heç bir ticarət obyektinə zərər dəyməyib. Bu isə yanğının şüurlu şəkildə törədildiyini düşünməyə əsas verir. Bununla bağlı Savash.org-a rayondan verilən məlumata görə, sahibkarın obyekti qəsdən yandırılıb və bu onun rayon rəhbərliyinin qəbul etmədiyinə görə kəsilmiş cəzadır.
Mənbəmiz iddia edir ki, ticarət obyekti yanan yaxud, yandırılan Rübail Cəfərovun rayon rəhbərliyi ilə ziddiyyətləri var. Bu isə baş vermiş yanğında Xaçmaz rayon icra hakimiyyəti başçısı Şəmsəddin Xanbabayevin barmağının olmasına dair şübhələri artırır.
Mövzuya qayıdacağıq.
