“İran-Ermənistan əlaqələri ilə bağlı gündəlik araşdırmalarımı davam etdirərkən, bu ilin fevral ayında İran İslam Respublikasının İrəvandakı səfirliyi, İrəvan Dövlət Universiteti və Ermənistan Elmlər Akademiyasının iranşünaslıq şöbəsinin “İran və Ermənistanın tarixi və çağdaş əlaqələri” mövzusunda keçirilən “beynəlxalq konfrans”da müzakirə edilən mövzular və səsləndirilən fikirlər diqqətimi çəkdi”.
Elchi.az xəbər verir ki, bu fikirləri siyasi şərhçi Elçin Mirzəbəyli FB hesabında qeyd edib:
“Konfransla bağlı İran, Ermənistan, eləcə də ABŞ və Fransadakı erməni diasporuna aid media resurslarında yayımlanan xəbər və reportajlarda bildirilir ki, tədbirdə İranın Ermənistandakı səfiri Abbas Bədaxşan Zohuri, İran parlamentinin erməni əsilli deputatları Robert Beqlaryan və Ara Şahverdiyan, Beyrutdakı Amedria insitutunun elmi işçisi, həmçinin erməni diasporunun Türkiyə əleyhinə təbliğat ruporu olan “Vanın səsi” radiosunda “Türkiyə bu gün” proqramının aparıcısı Yegia Taşçıyan, İran və Ermənistanı təmsil edən diplomat və alimlər də daxil olmaqla 20 məruzəçi iştirak edib.
Konfransda çıxış edən İran səfiri Zohuri İran-Ermənistan sərhədlərinin geostrateji əhəmiyyətindən, mövcud statis-kovonun qorunmasının vacibliyindən, iki ölkə arasındakı ticarət dövriyyəsinin 1 milyard dollara çatdırılmasından danışıb və təbii ki, erməni diplomatların, alim və ekspertlərin bölgədəki “pantürkizm meylləri”, “Zəngəzur dəhlizi təhlükəsi” barədə sərsəmləmələrini böyük məmnuniyyətlə dinləyib.
Daha sonra İran İslam Respublikasını təmsil edən deputat, alim və diplomatlar ermənilərlə səs-səsə verib 2020-ci ildə baş verən müharibənin, təkcə Ermənistana deyil, həm də İrana qarşı olduğunu bildiriblər. Həmçinin qeyd ediblər ki, “Türkiyə, Azərbaycan və İsrail İranın Avropaya və Rusiyaya alternativ marşrutlarının qarşısını almağa cəhd göstərirlər”.
Amma mollakratiyanın erməni sevgisi, sadəcə bu konfransla yekunlaşmayıb. Daha sonra İranın Ermənistandakı səfiri konfrans iştirakçıları üçün qəbul təşkil edib və 3 saatdan çox davam edən qəbulda Azərbaycan və Türkiyənin düşmənləri bundan sonra atacaqları addımlar barədə fikir mübadiləsi aparıblar. Səfirlikdə keçirilən qəbul zamanı çəkilən foto İran İslam Respublikasının diplomatik nümayəndəliklərində tətbiq olunan qaydaların ermənilər üçün “keçərli olmadığını” da sübuta yetirir. Səfirin Livandakı Amerika institunun elmi işçisi ilə çəkdirdiyi foto da həmçinin, sübuta yetirir ki, İran təmsilçilərinin son zamanlar tez-tez təkrarladıqları “qırmızı xətt” öz rəngini konkret situasiyaya uyğun dəyişə də bilir.
Qeyd edim ki, Azərbaycanın Zəfərindən sonra İranda və Ermənistanda bu qəbildən olan tədbirlər, demək olar ki, hər ay keçirilir, amma onların böyük əksəriyyəti haqqında məlumat verilmir. Bu konfranslarda İran və Ermənistanın xüsusi xidmət orqanları və müdafiə nazirlikləri arasında əlaqələrin intensivləşdirilməsi və hətta daimi fəaliyyət göstərən ortaq təsisatların yaradılması bağlı təşəbbüslər də irəli sürülür. Və bəlkə də artıq yaradılıb.
Digər tərəfdən, Beyrutda fəaliyyət göstərən Amerika institutunun elmi işçisinin İran səfirliyində keçirilən qəbulda iştirakı sübuta yetirir ki, Tehranın ABŞ-a qarşı ritorikası, yaxud Vaşinqtonun İran ətrafında yaratdığı ajiotaj məqsədyönlü xarakter daşıyır və ola bilsin ki, razılaşdırılmış siyasətin tərkib hissəsidir. İranın nüvə proqramı və digər bu kimi məsələlər ətrafında Vaşinqtondan davamlı olaraq üfürülən, dünya mediasını başına götürən informasasiyalar, əslində sözdə islam respublikasının guya qərbin maraqlarına qarşı mübarizənin ön cərgəsində dayandığı barədə görüntünün yaradılmasına xidmət edir. Bugünkü mənzərə bir daha sübuta yetirir ki, İran “İslam Respublikası” ABŞ, Fransa və bu kateqoriyadan olan dövlətlərin regionda türk-islam, eləcə də Avrasiya geoiqtisadi və geomədəni amilinin güclənməsində qarşı yaratdığı təsisatdır və öz missiyasını vaxtaşırı aldığı “siqnallar”ın alqoritminə uyğun olaraq,gücləndirir”.
Yeganə
Son şərhlər