UEFA, Dünya Kuboku və digər turnirlərin kommersiya hüquqlarını özəl investorlara satmaq planı ilə bağlı FIFA prezidenti Canni İnfantinoya qarşı şikayətlər verməyə hazırlaşır. Bu plan ictimaiyyətin etirazından sonra ləğv edilib.
Elchi.az xəbər verir ki, BBC Sport-un əldə etdiyi sənədlərə görə, Avropa futbolunun idarəetmə orqanı vəzifə səlahiyyətlərindən sui-istifadə etməkdə ittiham etdiyi İnfantinoya qarşı İsveçrədə açılacaq işdə istifadə ediləcək dəlil və sənədlərə çıxış istəyib. UEFA həmçinin digər FIFA rəsmilərinə qarşı məhkəmə prosesi başlatmağı düşündüyünü bildirib.
Bu yay keçirilən Dünya Kubokundan sonra İnfantino, FIFA-nın turnir hüquqlarının səhmlərini özəl investorlara satmağı hədəfləyən “FIFA Forward Enterprise” adlı yeni bir şirkətin yaradılmasını təklif etdi. Bu plan futbol ictimaiyyətinin sərt tənqidindən sonra geri götürüldü.
UEFA dəlil tələbində bu təşəbbüsün İnfantinoya və onun ətrafındakı kiçik bir dairəyə FİFA-nın ən dəyərli aktivlərində daimi pay əldə etmək və FIFA, üzvləri və futbol ailəsinin hesabına mənfəət əldə etmək üçün bir vasitə olduğunu bildirdi. Ərizədə həmçinin qeyd olunur ki, İnfantino bu planı tələsik təşkil olunmuş görüşdə irəli aparıb və əksər yüksək vəzifəli rəhbər vəzifəli şəxslərə və işçilərə ilk dəfə məlumat verilib və misli görünməmiş çoxmilyardlı layihəni təsdiqləmək üçün cəmi bir neçə saat vaxt verilib. UEFA və Avropa futbolunun aparıcı simaları Çempionlar Liqasının püşkatmasından əvvəl Monakoda İnfantinonun vəziyyətini müzakirə etmək üçün görüş keçiriblər. Görüşdən sonra UEFA iştirakçıların yekdilliklə UEFA prezidentinə və onun rəhbərliyinə institusional islahatları təmin etmək, prezident səlahiyyətlərini məhdudlaşdırmaq və FİFA-nın yenidən tək bir şəxs ətrafında deyil, bir qurum kimi idarə olunmasını təmin etmək üçün bütün zəruri institusional, siyasi və hüquqi vasitələrdən istifadə etməyə səlahiyyət verdiyini açıqlayıb.
BBC Sport məsələ ilə bağlı şərh almaq üçün İnfantino və FİFA rəsmiləri ilə əlaqə saxlayıb.
Şayəstə
