ABŞ Prezidenti Donald Trampın hər bir Amerika vətəndaşına 5000 dollar ödəmək vədi onun administrasiyasındakı rəsmiləri və müttəfiqlərini hazırlıqsız yaxaladı.
Elchi.az xəbər verir ki, Dallasda keçirilən Respublikaçılar Partiyasının aralıq seçkilərlə bağlı konfransında bu vədi verən Tramp, məsələni yalnız dar bir siyasi müşavirlər dairəsi ilə müzakirə etmişdi.
Bu vəziyyət Ağ Evdə büdcəyə 1 trilyon dollardan çox yük gətirəcək təklifin təfərrüatlarını və icra mexanizmini dəqiqləşdirmək üçün tələsik işlərin başlamasına səbəb oldu.
Bir çox respublikaçı qanunverici və partiya iqtisadçısı noyabr ayındakı aralıq seçkilər ərəfəsində irəli sürülən bu ideyanı qeyri-real hesab edərək, onun partiyanın əsas iqtisadi prinsiplərinə zidd olduğunu bildirdilər.
Daha sonra Ağ Ev tərəfindən yayılan məlumatda ödənişlərin hansı mənbədən maliyyələşdiriləcəyinə dair heç bir təfərrüat yer almırdı.
Tramp vəsaitin xarici ticarət tariflərindən əldə edilən gəlirlər hesabına təmin oluna biləcəyini irəli sürsə də, müstəqil təşkilatlar yeni tariflərin xərclərin yalnız onda birini qarşılaya biləcəyini bildirdilər.
Artan yaşayış xərcləri və inflyasiya səbəbindən seçicilərin narazılığını azaltmağa yönəlmiş bu gözlənilməz vəd, büdcə kəsirini artıracağı və inflyasiyanı körükləyəcəyini iddia edən ekspertlərin və iqtisadi müşahidəçilərin tənqidinə səbəb oldu.
Konqresin Büdcə İdarəsinin məlumatlarına görə, bu miqyasda ödəniş federal büdcədə nəhəng bir boşluq yaratmaq riski daşıyır.
Təklifin Konqresin təsdiqini tələb edib-etmədiyi ilə bağlı davam edən qeyri-müəyyənlik fonunda, müttəfiqlər və keçmiş partiya rəsmiləri bu addımın siyasi rüşvət kimi qəbul edilə biləcəyi barədə xəbərdarlıq etdilər.
Şayəstə
