Axios: Tramp Makrona Putinin Ukraynada “hər şeyi” götürmək istədiyini söylədi.
Elchi.az xəbər verir ki, ABŞ prezidenti Donald Tramp rusiyalı həmkarı Vladimir Putinlə söhbətindən sonra Fransa lideri Emmanuel Makrona zəng edərək, Rusiya liderinin “hər şeyi götürmək” istədiyini deyib. Bu barədə Axios mənbələrə istinadən xəbər verir.
Nəşrin yazdığına görə, Putin Trampa yaxın iki ay ərzində Rusiyanın mühüm mövqelərə malik olduğu regionların inzibati sərhədlərinə qədər irəliləmək üçün yeni cəhdlər edəcəyini açıqlayıb.
Putinlə söhbətini xatırladan Tramp Makrona “O, hər şeyi götürmək istəyir” deyib.
Axios yazır ki, Putin həmçinin Trampa yaxın bir neçə ay ərzində Rusiya Silahlı Qüvvələrinin Ukraynanın şərqində irəliləməyi planlaşdırdığını açıqlayıb.
Bundan əvvəl portalın jurnalisti Barak Ravid məlumatlı mənbələrə istinadən yazıb ki, Tramp iyulun 14-də Kiyevə hücum silahları da daxil ola biləcək yeni silah tədarükü planını açıqlayacaq. Amerika lideri həmçinin qeyd edib ki, ABŞ Ukraynaya “Patriot” sistemləri və müxtəlif hərbi texnikalar təhvil verəcək, bunun xərcləri Ukrayna tərəfi tərəfindən tam ödəniləcək.
Şayəstə Hüseynova
