Almaniyanın kanslerliyə namizədi və Xristian Demokratik İttifaqının (CDU) lideri Fridrix Merz ABŞ və Rusiya arasında dizel yanacağının ixracı ilə bağlı əldə edilən razılaşmanın Almaniya və Avropa üçün məqbul bir seçim olmadığını bəyan edib.
Elchi.az xəbər verir ki, Berlinlərdəki CDU qərargahında keçirilən mətbuat konfransında çıxış edən Merz ABŞ və Rusiya arasında dizel yanacağının ixracı ilə bağlı bağlanmış razılaşmaya toxunub.
“Belə bir qərar Almaniya və Avropa üçün qəbuledilməzdir”, – deyən Merz əlavə edib ki, Rusiya yalnız təzyiq altında ciddi danışıqlar aparır və buna görə də onlar Rusiyaya qarşı sanksiyaları tətbiq etməyə davam edəcəklər.
Merz Moskvanın Ukraynanın mülki enerji təchizatına hücumları səbəbindən sanksiyaların daha da sərtləşdirilməsinin zəruri olduğunu vurğulayıb.
Rusiyanın sülh təkliflərinə müsbət yanaşmayacağını bildirən Merz qeyd edib ki, Rusiya ABŞ Prezidenti Donald Trampın “enerji atəşkəsi” təklifinə Ukraynanın mülki enerji infrastrukturuna intensiv hücumlarla cavab verib.
“Biz müharibəyə son qoymağa kömək edəcək ortaq yol axtarırıq”
Merz vurğulayıb ki, Ukrayna Prezidenti Vladimir Zelenski Almaniya və Avropaya arxalana bilər.
Almaniya, Fransa və Böyük Britaniya nümayəndələrinin həftəsonu ABŞ administrasiyası ilə görüşdüyünü qeyd edən Merz deyib: “Biz bu müharibəyə son qoyulmasına necə töhfə verə biləcəyimizlə bağlı ortaq yol axtarırıq. Müəyyən məsələlərlə bağlı fərqli fikirlər mövcuddur”.
Ukraynaya yardımı davam etdirəcəklərini bildirən Merz vurğulayıb ki, onlar bu münaqişədə bitərəf vasitəçi deyillər, əksinə, qətiyyətlə Ukraynanın tərəfindədirlər. CDU İdarə Heyətinin hökumət və partiyadakı vəziyyəti müzakirə etmək üçün iki gün toplandığını qeyd edən Merz izah edib ki, onlar büdcədəki maliyyə resurslarından istifadə etməklə əhalinin üzərinə düşən iqtisadi yükü yüngülləşdirmək üçün səylər göstərmək qərarına gəliblər.
Bu kontekstdə Merz bildirib ki, onlar ötən il verdikləri vədə uyğun olaraq, elektrik enerjisi vergisini hər kəs üçün Avropa İttifaqında (Aİ) tətbiq olunan minimum səviyyəyə endirəcəklər.
Şayəstə
