ABŞ prezidenti Donald Tramp bu həftə onlarla ölkəyə qarşı yeni idxal rüsumları tətbiq etmək niyyətindədir.
Elchi.az xəbər verir ki, bu barədə iyulun 21-də mənbələrə istinadən “Financial Times” (FT) qəzeti məlumat verib.
Nəşrin məlumatına görə, yeni tarif sistemi müddəti iyulun 24-də başa çatacaq 10 faizlik rüsumları əvəz edəcək. Bəzi müşavirlərin aralıq seçkiləri ərəfəsində ehtimal olunan iqtisadi fəsadlarla bağlı narahatlığına baxmayaraq, Tramp ticarət siyasətini sərtləşdirmək qərarına gəlib.
Yeni tariflərin həcminin 10%-dən 12,5%-ə qədər olacağı gözlənilir. Bu rüsumlar Avropa İttifaqı ölkələri, Çin, Yaponiya, Hindistan, Cənubi Koreya, Meksika və Cənub-Şərqi Asiyanın bir sıra dövlətləri daxil olmaqla, təxminən 60 ölkəyə şamil oluna bilər.
FT-nin qeyd etdiyi kimi, yeni tədbirlərin məcburi əmək praktikası ilə bağlı aparılan araşdırmanın yekunlarına əsasən tətbiq olunması planlaşdırılır. Bu, ABŞ administrasiyasına tətbiqi daha əvvəl Ali Məhkəmə tərəfindən məhdudlaşdırılmış fövqəladə səlahiyyətlərdən istifadə etmədən hərəkət etməyə imkan verəcək.
Məryəm
