Uelsdə keçirilən NATO sammiti çərçivəsində baş tutan Əliyev-Kerri-Sərkisyan danışıqları fonunda Britaniyanın “The Economist” həftəliyi Dağlıq Qarabağ münaqişəsinə yer ayırıb.Virtualaz.org saytının xəbərinə görə, “Dağların münaqişəsi” adlı məqalədə deyilir ki, erməni və azərbaycanlı əsgərlərin mövqelərini cəmi 150 metr məsafə ayırır. Qondarma “Dağlıq Qarabağ” qüvvələrinin zabiti deyir ki, bu yay ötən yaylardan daha gərgin keçdi.
“Bu, Ukrayna hadisələrinin əks-sədası idi” – deyə məqalədə bildirilir.
“The Economist” 1988-ci ildə başlayan münaqişədə 30 mindən çox adamın həlak olduğunu, Azərbaycanın ərazilərinin bir hissəsini itirdiyini xatırladır.
Nəşr yazır ki, 1994-cü ildə bağlanmış atəşkəs razılaşması kövrəkdir və təmas xəttində atışmalar əvvəllər də tez-tez baş verib. Lakin bu il toqquşmalar daha ciddi oldu, xüsusi təyinatlıların reydi adi xarakter aldı, snayper atəşləri artdı. Və bu gərginlik Azərbaycan-Ermənistan sərhədi boyu da yayıldı.
Nəşr Rusiya prezidenti Vladimir Putinin təşəbbüsü ilə Soçidə keçirilən görüşdən sonra gərginliyin azaldığını qeyd edir.
Karnegi Fondunun eksperti Tomas de Vall bildirir ki, tərəflərin beynəlxalq vasitəçilərə və təhlükəsizlik təminatına inamı artıq sarsılıb. ABŞ-ın Bakıdakı keçmiş səfiri Metyu Brayza da bu fikirdədir. O deyir ki, Bakının rəsmi şəxsləri suverenlik və öz müqəddəratını təyinetmə məsələsində ikili standartlara yol verildiyini görürlər.
“Onlar sual edirlər ki, nəyə görə Qərb Krımın ilhaqına görə Rusiyanı cəzalandırır, ancaq Ermənistana Qarabağın işğalına görə heç bir sanksiya tətbiq etmir. Çoxları sual edir ki, nəyə görə Qərb Ukraynanın ərazi bütövlüyünü qorumaq üçün güc tətbiq etməsini dəstəkləyir, ancaq Azərbaycanı dözməyə və ancaq sülh yolunu seçməyə çağırır. Nəticədə Azərbaycan Qərbin münaqişəni həll etmək qabiliyyətinə etimadını itirir” – deyə Brayza bildirir.
Son şərhlər