«Əmək və Əhalinin Sosial Müdafiə naziri Səlim Müslümov tabeliyində olan işçilərin neqativ hərəkətlərini ört-basdır etmək üçün jurnalistlərə qarşı xüsusi ittihamla çıxış etmək barədə tapşırıq verib»
Bunu «Poliqon» İnformasiya Agentliyninin (pia.az) baş redaktoru Azər Qaramanlı saytımıza verdiyi açıqlamasında bildirib.Qeyd edək ki, baş redaktora qarşı 25 saylı TSEK-in rəhbəri Fəridə Abdullayeva xüsusi ittihamla məhkəməyə müraciət edib. Növbəti məhkəmə prossesi oktyabrın 16-da Neftçala Məhkəməsində keçiriləcək.
Məsələ ilə bağlı açıqlama verən baş redaktor bildirir ki, ona açıq şəkildə bildirirlər ki, xüsusi ittihamla məhkəməyə müraciət nazir Səlim Müslümovun tapşırığı ilə həyata keçirilib və iddianın geri götürülməsi ilə bağlı Səlim Müslümov şəxsən qərar verməlidir:
«Bu prosses artıq bir neçə aydır ki, davam edir. Əslində bizə qarşı irəli sürülən iddia absurddur və məhkəmənin bu iddianı xüsusi ittiham qaydasında icraata götürməsi qanunvericiliyə ziddir. İddiaçı Fəridə Abdullayeva məhkəməyə verdiyi iddianamədə bildirir ki, güya PİA.AZ saytı onun haqqında həqiqətə uyğun olmayan məlumatları yayıb və sonra da bu məlumatlar ayrı-ayrı xəbər saytlarında və qəzetlər tirajlayıb. Buna görə də, Fəridə Abdullayeva hesab edir ki, biz onun şərəf və ləyaqətini təhqir alçaldan, işgüzar nüfuzuna xələl gətirən hərəkətlərə yol vermişik. Amma biz dərc etdiymiz yazıda «Xüsusi ittiham qaydasında şikayətlərə dair işlərə baxılması üzrə məhkəmə təcrübəsi haqqında» Azərbaycan Respublikası Ali Məhkəməsi Plenumunun 21 fevral 2014-cü il tarixli 3 saylı qərarında göstərilən qaydada heç kimin şərəfə və ləyaqətinə, işgüzar nüfuzuna xələl gətirən hərəkətlərə yol verməməmişik. Buydan başqa isə dövlət məmurunun işgüzar nüfuzundan söhbət gedə bilməz.
Digər tərəfdən bizim dərc etdiyimiz yazı faktiki olaraq Qarabağ müharibəsi Veteranları və Əlilləri Cəmiyyətinin Daşkəsən rayon şöbəsinin sədri Bəxtiyar İsmayılovun şikayəti əsasında hazırlanıb və vətəndaş Bəxtiyar İsmayılovla telefon danışıqları audio yazıya alınıb. Həmin audioyazıları biz istər ictimaiyyətə, istərsə də məhkəməyə təqdim edəcəyik. Yəni faktiki olaraq Qarabağ müharibəsi Veteranları və Əlilləri Cəmiyyətinin Daşkəsən rayon şöbəsinin sədri Bəxtiyar İsmayılov Fəridə Abdullayevaya külli-miqdarda rüşvət verməsi barədə ortada iddiası var və Bəxtiyar İsmayılovun səsyazıları bizdə mövcuddur. Və Bəxtiyar Hacıyev hələ də öz iddasından geri çəkilmir və dəfələrlə bu barədə nazir Səlim Müslümova da müraciət edib. Buna görə də Fəridə Abdullayevanın bizə qarşı irəli sürdüyü iddia absurd xarakter daşıyır və məhkəmənin belə bir iddianı xüsusi itiham qaydasında qəbul etməsi prossesual qaydalara ziddir».
Baş redaktorun bildirdiyinə görə bu məsələ Mətbuat Şurasının da diqqət mərkəzində olub və Mətbuat Şurası Fəridə Abdullayava ilə iddanın geri çəkilməsi ilə bağlı danışıqlar aparıb və razılığa gəlinib:
«Mətbuat Şurası bu məsələ ilə bağlı Fəridə Abdullayeva ilə razılıq əldə etmişdi. Şəxsən mənim çox hörmət etdiyim Mətbuat Şurasının İcraçı katibi Rəhim Hüseynov mənim yanımda Fəridə Abdullayeva ilə danışıb. Fəridə Abdullayeva bildirib ki, əgər bizim tərəfimizdən təkzib verilərsə, o, iddasından geri çəkilə bilər. Mən öz tərəfimdən rəsmi şəkildə bildirirəm ki, biz heç kimə qarşı böhtan və şər kampaniyası aparmamışıq. Ortada şikayətçi tərəf var və biz PİA.AZ olaraq haqlı tərəf olmağımıza baxmayaraq, Fəridə Abdullayevanın qadın olmasını, həmçinin çox hörmət etdiyim Rəhim Hüseynovun xahişini nəzərə alaraq belə bir təkzib verməyə razılıq verdim. Bundan sonra isə Fəridə Abdullayeva verdiyi sözü tutmaqdan imtina etdi. Fəridə Abdullayeva bildirib ki, bu barədə ona nazirin tapşırığı olub və nazirin razılığı olmadan iddasını geri götürə bilməz. Əgər xanım Fəridə Abdullayevanın nazirdən «sifarişi» vardısa, o zaman niyə Mətbuat Şurası ilə danışıqlara gedir və təkzib verilməsini xahiş edirdi?»
Baş redaktor bildirir ki, nazir Səlim Müslümovun «sifarişçi» olması həmçinin nazirliyin mətbuat xidməti tərəfindən də təsdiqlənib:
«Bundan sonra mənə yaxın olan jurnalist dostlarımdan biri Əmək və Əhalinin Sosial Müdafiə Nazirliyinin mətbuat xidmətinin rəhbəri Elman Babayevlə əlaqə saxlayıb. Elman Babayev bildirib ki, bu məsələ barədə ancaq nazir Səlim Müslümov şəxsən qərar verə bilər və hazırda nazir ABŞ-da səfərdə olduğundan geri döndükdən sonra bu məsələ öz həllini tapa bilər. Nazir geri döndükdən sonra isə, Elman Babayev bildirdi ki, qərar nazirin sentyabrın 26-da Gəncədə vətəndaşları qəbul etməsindən sonra veriləcək.
Cənab nazir Gəncədə vətəndaşları qəbul etdikdən sonra isə dondurulmuş məhkəmə işi yenidən aktivləşdirildi. Onu da qeyd edim ki, nazir Səlim Müslümovun Gəncədə Fəridə Abdullayeva ilə görüşməsi ilə bağlı məlumatımız var. Bu görüşdən sonra isə məhkəmə işinin yenidən dövriyəyə qaytarılması nazirin bu işdə «sifarişçi» olduğunun daha bir göstəricisidir».
Baş redaktor həmçinin bir nazirin mətbuata qarşı bu mövqeyindən təəssüf hissi keçirdiyini bildirib:
«Doğrusu Səlim Müslümovun mövqeyi məni təəccübləndirir. Bir nazirin öz işçisinə qarşı vətəndaşın və Qarabağ qazisinin həddindən artıq ciddi iddaları olduğu halda nazirin məsələni araşdırmaq əvəzinə mətbuatı cəzalandırmaq istəməsi ancaq təəssüf hissi doğura bilər. Belə çıxır ki, nazir korrupsiyanın və rüşvətxorluğun inkişafına rəvac verir və bütün imkanları ilə bu barədə yazan mətbuatı cəzalandıraraq susdurmağa çalışır.
Onu da qeyd edim ki, Səlim Müslümov nazir postuna gətirilirkən populistcəsinə verdiyi vədlərinin heç birinin üzərində dayanmadı. Nazir bildirmişdi ki, prezidentdən aldığı tapşırığa əsasən nazirlikdə baş alıb gedən neqativ hallara qarşı ciddi mübarizə aparacaq. Ancaq ortada olan mənzərə tamamilə başqadır. Bu gün Əmək və Əhalinin Sosial Müdafiə Nazirliyi əhalinin ən çox şikayətçi olduğu nazirlikdir və şikayətlərin sayı sabiq nazir Füzuli Ələkbərovun zamanında olduğundan daha çox artıb. Bu gün mətbuatın ən çox neqativ yazılar yazdığı nazirlik də məhz Əmək və Əhalinin Sosial Müdafiə Nazirliyidir.
Demək ki, nazir Səlim Müslümov öz işçilərinin neqativ hallarının qarşısını almaq istəmir və çıxış yolunu mətbuatı cəzalandıraraq susdurmağa çalışır. Amma bu vətədaşların şikayətlərinin qarşısını almaq üçün heç də yetərli üsul deyil. Çünki vətəndaşlar nazirliklə bağlı şikayətlərini təkcə mətbuata ünvanlamırlar, həmçinin prezident İlham Əliyevə və Prezident Adminstrasiyasna da ünvanlayırlar.
Ona görə də hesab edirəm ki, nazir Səlim Müslümov vətəndaşların şikayətlərinin qarşısının alınması üçün rəhbərlik etdiyi qurqmda tədbirlər həyata keçirməlidir. Güman edirəm ki, bununla bağlı aşkarlıq və şəffalıq mühiti yaradılarsa, mətbuat nazirə hər cür yardım göstərməyə hazırdır».
Qarabağ müharibəsi Veteranları və Əlilləri Cəmiyyətinin Daşkəsən rayon şöbəsinin sədri Bəxtiyar İsmayılovla telefon danışıqlarının birinci audio yazısını ictimaiyyətin diqqətinə çatdırırıq:
pia.az
Son şərhlər