Texasda 80 ev sahibi SpaceX-ə qarşı iddia qaldıraraq raket sınaqlarından çıxan səs bombalarının evlərinə ziyan vurduğunu iddia edib. Şirkət “kobud səhlənkarlıq” və “yerə qanunsuz girməkdə” ittiham olunur.
Elchi.az xəbər verir ki, Texasda 80 sakin raket sınaqlarından çıxan yüksək səs bombalarının evlərinə ziyan vurduğunu iddia edərək SpaceX-ə qarşı kollektiv iddia qaldırıb.
Texas Tribune qəzetinin məlumatına görə, iddia 2023-cü ilin apreli ilə 2025-ci ilin oktyabrı arasında aparılan 11 raket sınağını əhatə edir. İddiaçılar şirkəti “kobud səhlənkarlıq” və “yerə qanunsuz girməkdə” ittiham edirlər.
İddiada bildirilir ki, raketlərin həm buraxıldığı, həm də geri qayıtdığı sınaqlar zamanı evlər uzun müddət yüksək və zərərli səs-küyə məruz qalıb. Bildirilir ki, səs sürətini aşan cisimlər tərəfindən yaradılan bu partlayışlar güclü olduqda şüşə sınması kimi fiziki ziyana səbəb ola bilər.
Sakinlər iddia edirlər ki, 2023-cü ildə Starship-in buraxılışı zamanı 33 mühərrikli raketin yaratdığı qüvvə buraxılış meydançasını dağıdıb və təxminən 1,2 kilometr məsafəyə dağıntılar səpələnib.
Ərizədə fərdi zərər elementləri ətraflı göstərilməsə də, səs bombalarının divarlara, pəncərələrə və damlara zərər verə biləcəyi vurğulanır. İddiaçılar qeyri-müəyyən miqdarda kompensasiya tələb edirlər.
ABŞ Federal Aviasiya Administrasiyası SpaceX-ə 2025-ci ilə qədər Cənubi Texasdan ildə 25-ə qədər raket buraxmaq üçün icazə vermişdi. Bu, əvvəlki illə müqayisədə təxminən beş dəfə artım deməkdir.
Şirkətin bölgədəki fəaliyyəti də sürətlə genişlənib. Starbase adlı yaşayış məntəqəsi 2025-ci ildə yaradılıb. Digər tərəfdən, buraxılışlar səbəbindən sahil xəttinin təxminən 13 kilometri bəzən giriş üçün bağlanır; bu vəziyyət ayrı-ayrı hüquqi mübahisələrə səbəb olub.
2002-ci ildə qurulan SpaceX-in baş direktoru İlon Mask şirkətin idarəçiliyində həlledici mövqe tutur. Şirkətin həmçinin yaxın gələcəkdə ilkin kütləvi təklif (IPO) üçün hazırlaşdığı bildirilir.
Şayəstə
