Bütöv Azərbaycan Xalq Cəbhəsi Partiyasının (BAXCP) sədri, millət vəkili Qüdrət Həsənquliyev Gürcüstanın keçmiş prezidenti Mixail Saakaşvilinin azad olunması ilə bağlı fikirlərini Elchi.az-la bölüşüb.
-Qüdrət bəy, Saakaşvilinin son görüntüləri onun sanki konslagerdə saxlandığını xatırladır. Qərb ölkələri onun azadlığı üçün niyə Gürcüstana təzyiq etmir?
-Saakaşvilinin Ukrayna və Gürcüstan üçün Qərbdən gözləntiləri böyük idi. O, Qərbin bu iki ölkəyə verdiyi dəstəyi qənaətbəxş hesab etmədiyi üçün həbsdən əvvəl onları ciddi tənqid edirdi. Bir müddət Qərbdə yaşasa da ikiüzlü Qərb siyasətini tam dərk etməmişdi. Ona görə onu aldadıb Gürcüstana göndərdilər və həbsinə imkan yaradıb susdurdular. Hazırda onun ölümü bəzi Qərb dairələrinə, şəxsiyyətləri ikiləşmiş Qərbin bir çox liderlərinə sərf edir. Düşünürlər ki, ölərsə, həm canları bu çılğın siyasətçidən qurtarar, həm də bundan istifadə edib Gürcüstanda inqilab edərlər.
-Gürcü xalqı niyə susur?
Saakaşvili rüşvətlə yaşamağa öyrənmiş xalqın həyatını “korlamışdı”. Rusiya ilə münasibətlər tam pozulmuşdu. Xalqa lazım idi Rusiya ilə gediş-gəliş, alış-veriş olsun, pul qazansınlar, qanunları pozub rüşvət verib məsuliyyətdən yayınsınlar və s. Çoxluq düşünür ki, əsas soyuducuda yeməyə nəyinsə olmalıdır, sosial vəziyyətdir. Digər dəyərlər və məsələlər onun ardınca gəlir. Axı, hamı idealist, demokratik dəyərlərə sadiq deyil. Saakaşvili anlamırdı ki, gürcülər İvanaşviliyə Rusiya ilə yaxın əlaqələrinə görə səs verib. Onun ölümü çoxlarına sərf edir. O, Azərbaycanın dostudur. Məhz buna və insanlıq xatirinə onun azad olunmasına biz də çalışmalıyıq. Azərbaycan zaman-zaman həlli çətin görünən bir çox regional problemlərin çözülməsinə yardımçı olub, töhfə verib. Rusiya və Gürcüstanla bu barədə danışmalıyıq.
Saakaşvilinin ən böyük səhvlərindən biri də o oldu ki, xalqına o dəyərləri aşılaya bilmədi ki, soyuducunun dolu olmasının, özünü qorumağın və müdafiə etməyin tək yolu başqalarının hüquqları üçün, ədalət naminə fədakarlıq etməkdir. Çünki sənin hüquqların pozulanda təkbaşına nə etsən də özünü müdafiə edə bilməyəcəksən, xalqın kütləvi dəstəyinə ehtiyac yaranacaq. Fransadakı son nümayişlər də göstərdi ki, inkişaf etmiş cəmiyyətlərdə insanlar başqalarının ağrı-acısını özününkü kimi qəbul edir və reaksiya verir. Gürcüstanda isə Saakaşvilini müdafiə edən azsaylı partiya üzvləri bunu öz siyasi məqsədləri üçün edirlər. Həm də sona qədər dirəniş göstərmirlər. Demokratik cəmiyyət üçün həmin dəyərləri mənimsəmiş və onu qorumaq üçün fədakarlığa hazır olan insanlar yetişdirmək lazımdır. Bu isə vaxt tələb edir. Hay-küylə buna nail olmaq mümkün deyil. Saakaşvili yanlış siyasəti ilə özünə ölüm hökmü çıxardıb. Allah köməyi olsun…
Son şərhlər