Rusiya-Ukrayna müharibəsinin taleyi böyük ölçüdə NATO və Qərbin Kiyevə verəcəyi dəstəkdən asılıdır. Bu günə qədər Ukraynaya verilən yardımın həcmi kifayət qədər böyük olsa da Rusiya üzərində qələbə çalmaq üçün yetərli olmayıb. Səbəb isə Ukraynanın daha çox müdafiə silahları ilə təmin olunması ilə bağlıdır. Rəsmi Kiyevin dəfələrlə etdiyi müraciətlərə baxmayaraq hələ də orta və uzaq mənzilli raketlərlə təminat demək olar ki, yox dərəcəsindədir”- bu sözləri Elchi.az-a açıqlamasında AMİP Mərkəzi Şurasının sədri, politoloq Rəşad Bayramov deyib.
O, həmçinin qeyd edib: “Təsəvvür edin ki, müharibənin artıq bir ili tamam olur, amma Qərb koalisiyası Ukraynanı müasir tanklarla silahlandırmaq üçün hələ indi-indi hərəkətə keçir. İstər canlı qüvvə baxımından, istərsə də texnika və silah-sursat baxımından böyük itkilər verən Rusiya üçün vəziyyət təbii ki, olduqca mürəkkəbdir. Çünki müharibəni davam etdirmək üçün olduqca böyük maliyyə imkanları lazımdır. Rusiyanın maliyyə imkanları isə tətbiq olunan sanksiyala səbəbilə hər keçən gün azalır.
Döyüşlərin nə ilə nəticələnəcəyini və ümumiyyətlə, Rusiyanın Ukraynaya müdaxiləsinin nə ilə nəticələnəcəyini dəqiq demək mümkün olmasa da bir şey dəqiqdir ki, Rusiya–Ukrayna müharibəsi Rusiyanın iqtisadi cəhətdən çökməsi, beynəlxalq birlikdən təcrid olunması ilə nəticələnəcək. Belə ki, bu müharibənin nəticəsində ən çox uduzan Rusiya olacaq. Çünki beynəlxalq sanksiyaların dağıdıcı təsiri hər keçən gün artır. İkinci bir tərəfdən bu müharibə iki dövləti və xalqı bir daha bir araya gəlməyəcək şəkildə ayırdı. Rusiya bəlkə də Donbas ərazisini qopara bilər, amma Ukraynanı tamamilə, birdəfəlik itirdi. Halbuki Putin bu savaşı Donbasın qalan hissəsini də almaq üçün yox, bütün Ukraynanı tabe etdirmək niyyəti ilə başlatmışdı. Müharibə Rusiyanın hərbi qüdrəti ilə bağlı təsəvvürləri də azaltdı. Artıq indiki Rusiyanın hərbi potensialı o qədər də çəkindirici gəlmir və nəhayət Rusiyanın beynəlxlaq nüfuzu ciddi şəkildə yara aldı”.
Politolog Rusiyanın qələbəsi və ya məğlubiyyətinin ölkəmizə təsirini Ukrayna cəbhəsində Rusiyanın qələbəsi bu ölkəni bütün post-sovet məkanını öz təsiri altına almağa şirnikləşdirəcəyini vurğulayıb.
“Başqa sözlə desək belə bir ehtimal halında MDB ölkələrindəki separatçı rejimlərə maksimum dəstək verməklə ayrı-ayrı ölkələrə təzyiqlərin şahidi ola bilərik. Bura Azərbaycan da daxildir. Bu gün Ukrayna cəbhəsində bataqlığa düşmüş Rusiyanın başı böyük ölçüdə qarışdığı üçün Cənubi Qafqazdakı maraqlarını genişləndirmək üçün yetərli qədər imkanlara malik deyil. Başqa sözlə desək hal-hazırda özü üçün ikinci cəbhə açmaq niyyətində deyil. Odur ki, düşüncəmə görə Rusiyanın məğlubiyyəti halında qazanacaqlarımız itirəcəklərimizdən daha çox olacaq”.
Havar Şəfiyeva