Pentaqonun Baş Müfəttişi İranla müharibə nəticəsində yaranan sursat çatışmazlığını etiraf edib.
Elchi.az xəbər verir ki, Pentaqonun Baş Müfəttişi bildirib ki, İranla müharibə sursat çatışmazlığına və ehtiyatların bərpası ilə bağlı çətinliklərə səbəb olub. BBC rəsmi məlumatlara istinadən bu barədə xəbər yayıb.
Hesabatda qeyd olunur ki, bu qiymətləndirmə ABŞ Prezidenti Donald Trampın demək olar ki, məhdudiyyətsiz sursat ehtiyatları barədə bəyanatları ilə ziddiyyət təşkil edir.
Müstəqil nəzarət orqanı bildirib ki, ABŞ fevral və iyun ayları arasında sursata 22 milyard dollardan çox vəsait xərcləyib və bu, “strateji ehtiyat çatışmazlığı” ilə nəticələnib. Hesabatda həmçinin ehtiyatların bərpasına mane olan “sənaye bazasındakı məhdudiyyətlər” də müəyyən edilib.
BBC-nin məlumatına görə, hesabatda daha sonra qeyd olunur ki, Pentaqon hazırda çatışmazlığı aradan qaldırmaq və “gözlənilməz vəziyyətlərə çevik reaksiya vermək” məqsədilə “satınalma proseslərini və istehsal müddətlərini optimallaşdırmaq” üzərində işləyir.
Bununla belə, Ağ Ev hesabatdakı qiymətləndirmələri rədd edib.
Bundan əvvəl *The New York Times* qəzeti ABŞ-ın kritik əhəmiyyətli sursat ehtiyatlarının tarixi minimuma düşdüyü barədə məlumat vermişdi. Qəzetin istinad etdiyi mənbəyə görə, ABŞ vitse-prezidenti C.D. Vens yaz və yay aylarında Yaxın Şərq, Avropa və Asiyadakı amerikalı zabitlərlə şəxsən söhbət edərək, qoşunların ehtiyatları və Yaxın Şərqə silah tədarükünün Çin, Rusiya və Şimali Koreyanı çəkindirmək imkanlarına necə təsir edəcəyi barədə onların real qiymətləndirmələrini öyrənib.
Şayəstə
