“Ermənistanla sülh müqaviləsi imzalanmasını bir çox aspektlərdən analiz etsək də, bu müqavilənin qalıcı və davamlı olması faktı bütün aspektlərdən öndə gəlir. Azərbaycan bu müqavilədən siyasi prosesi başa çatdırmaq üçün çalışsa da, Ermənistanın məcburiyyət altında sülhə gəlməsi yaxın və ya uzaq perspektivdə yenidən proseslərin gərginləşməsinə səbəb ola biləcəyi ehtimalı həmişə gündəmdə olacaq, xüsusən də, Ermənistan cəmiyyəti bu sülhdən razı qalmasa”.
Bu fikirləri Elchi.az-a açıqlamasında BAXCP sədrinin müşaviri, politoloq Azər Qasımov FB hesabında qeyd edib:
“Qalıcı sülh Ermənistan cəmiyyətini daha da “sındırmadan” bağlanmalıdır. Bunun üçün yollar axtarılmalıdır. Azərbaycanın güclü vaxtında Ermənistanın hər cür “sındırılması” həll yolu deyildir. Vaxtı ilə Azərbaycan da bu səbəbdən 30 il gözlədi və böyük ölçüdə öz istəyinə çatdı.
Azərbaycan Ermənistanın indiki hakimiyyətinin sülh müqaviləsindən sonra da uzun müddət hakimiyyətdə qalmasını təmin edəcək sülh müqaviləsi imzalanmalıdır, yoxsa imza atan kimi devrilən və qaçan hakimiyyətin imzasını əvvəla parlament ratifikasiya etməz, sonra isə onun yerinə gələnlər qanunsuz sayaraq ləğv edər. Bu baxımdan, elə bir yol seçilməlidir ki, həm Ermənistan cəmiyyəti və hakimiyyəti, həm də destruktiv maraqlı güclər bu sülhə mane ola bilməsin. Bu, nə təzyiq, nə hədə, nə də müharibə yoludur.
Ermənistanı qalıcı sülhə məcbur etməyin tək yolu reparasiyadır, yəni təzminat ödəməyə məhkum etmək. Bununla Ermənistana istədiyimizi etdirə bilərik, səsləri də çıxmaz”.
Yeganə
Son şərhlər