Birləşmiş Millətlər Təşkilatının (BMT) Baş katibi Antonio Quterreş ABŞ və İran arasında, o cümlədən İsrail arasında əldə edilən müvəqqəti atəşkəsi alqışlayıb.
Elchi.az xəbər verir ki, BMT Baş katibinin sözçüsü Stefan Dujarrikin yazılı açıqlamasında bildirilib ki, Quterreş regiondakı münaqişədə iştirak edən bütün tərəfləri beynəlxalq hüquq çərçivəsindəki öhdəliklərinə əməl etməyə və atəşkəsin şərtlərinə hörmət etməyə çağırıb.
Bəyanatda atəşkəsin regionda davamlı və hərtərəfli sülhün bərqərar olması üçün vacib olduğu və Quterreşin iki həftəlik atəşkəsdən məmnun olduğu qeyd edilib.
Bəyanatda həmçinin Quterreşin hərbi əməliyyatların dərhal dayandırılmasının mülki əhalinin qorunması və humanitar əzabların azaldılması üçün vacib olduğunu vurğuladığı və atəşkəsə nail olmaq üçün müxtəlif ölkələrin, xüsusən də Pakistanın həyata keçirdiyi vasitəçilik səylərindən məmnun olduğu bildirilib. Bəyanatda həmçinin BMT Baş katibinin xüsusi nümayəndəsi Jan Arnonun regiondakı əlaqələrini davam etdirdiyi və davamlı sülhə doğru səyləri dəstəklədiyi barədə məlumat paylaşılıb.
ABŞ prezidenti Donald Tramp Hörmüz boğazının tam açılması şərti ilə İranla iki həftəlik qarşılıqlı atəşkəsə razılaşdığını açıqladı.
Digər tərəfdən, İran hökuməti 15 günlük atəşkəs dövründə Pakistanda ABŞ və İsraillə müharibəyə son qoymaq üçün danışıqları başa çatdırmağı hədəflədiyini bildirdi.
Şayəstə
