QHT fəalları Novruz bayramını ön cəbhədə-zabit və əsgərlərlə birgə qeyd etdilər
“Xocalı Soyqırımını Tanıtma” və “Yeni Yurd”ictimai birliklərinin fəallarının sinələrini düşmən gülləsinə sipər edən ərənlərimizlə görüşü ənənə halını halıb.Bu təşkilatların üzvləri 2014-cü ildə Gəncə,Tovuz,Qazax,Ağdam,Tərtər bölgələrindəki hərbi hissələrin şəxsi heyətinin qonağı olub.Bu il fevralın 7-də Şəhid Milli Qəhrəmanımız Mübariz İbrahimovun xidmət etdiyi hərbi hissənin şəxsi heyətilə görüşən QHT fəalları, martın 3-də Tərtər bölgəsindəki “N”saylı hərbi hissənin yubileyində iştirak ediblər. Azərbaycanın Milli Qəhrəmanı Asif(Fred)Məhərrəmov adına İnkişaf Fondunun sədri,II dərəcəli müharibə əlili Hacı Ədalət Məhərrəmov,”Gəncliyə Yardım Fondu”nun vitse-prezidenti Salman Əliyev, “Ana harayı” qəzetinin baş redaktor müavini, şair Vaqif Nəcəfzadə, “Xocalı Soyqırımını Tanıtma”ictimai birliyinin şöbə müdiri Dilbər Sultanova da bu tədbirlərdə aktiv iştirak ediblər.
Martın 19-da hər iki Təşkilatın fəalları cəbhə bölgəsindəki “N” saylı hərbi hissənin zabit, gizir və əsgərlərilə görüşdülər.Xalqımızın milli bayramı-Novruz bayramına həsr edilən tədbiri şair, bədii qiraət ustası Elşən Sabiroğlu və istedadlı müğənni, “Ozan” mükafatı laureatı Zeynəb Məmmədzadə açdı. “Xocalı Soyqırımını Tanıtma” ictimai birliyinin sədri, “Yeni Yurd” Sosial İnkişaf ictimai birliyinin icraçı direktoru, “Ana harayı” qəzetinin baş redaktoru, “Tərəqqi” medalının mükafatçısı, müharibə veteranı Şamil Sabiroğlu və “Yeni Yurd” Sosial İnkişaf ictimai birliyinin sədri Mahirə xanım Əsədova əziz bayramı ön xətdə, Vətənimizin keşikçiləri ilə birgə keçirdiklərinə görə hədsiz məmnun olduqlarını dilə gətirdilər. Mahirə xanım, yeganə oğlu, 8 yaşlı Nurəlinin Azərbaycan Ordusu sıralarında həqiqi hərbi xidmətə yola düşəcəyi günü səbirsizliklə gözlədiyini qeyd etdi. 20 Yanvar Cəmiyyəti sədrinin I müavini, Azərbaycan Respublikasının Prezidenti tərfindən müxtəlif mükafatlara layiq görülmüş Mustafa Əliyev, Respublika “Əsgər Ailəsi” Cəmiyyətinin sədri, ehtiyatda olan baş leytenant, jurnalist Roza Əliqızı (Hüseynova), “Xocalı Soyqırımını Tanıtma” ictimai birliyinin şöbə müdiri, şairə Dilbər Sultan, həmin təşkilatın Abşeron rayon şöbəsinin müdiri, şairə Zeynəb Şahidqızı, “Sosial Rifah və Tədqiqatlar” ictimai birliyinin sədri, “fact-info.az” saytının baş redaktoru Əkrəm Bəydəmirli, “Yeni Yurd” ictimai birliyinin sədr müavini Natiq Qasımov, həmin Təşkilatın Kütləvi Tədbirlər şöbəsinin müdiri İlkin Məmmədzadə, “Xebertv.az” saytının rəhbəri Əvəz Almədətov, Beyləqan rayonunun tanınmış ziyalılarından biri, “Xocalı Soyqırımını Tanıtma” ictmai birliyinin üzvü Asif Quliyev, “Beyləqan Gənclərinin Maarifləndirilməsi və Sosial İnkişaf” ictimai birliyinin sədri Zaur Quliyev və başqaları Azərbaycanın namusunu qoruyan ərənlər qarşısında çıxış etdiklərinə görə özlərini çox xoşbəxt sandıqlarını bildirdilər.Tanınmış şairə Zeynəb Şahidqızı, Dilbər Sultan, Mustafa Əliyev və başqaları Vətənə, torpağa və Azərbaycan əsgərinə həsr olunan şeirlər söylədilər.
Beyləqan rayon Niyazi adına Uşaq Musiqi Məktəbinin “Aranqala” instrumental ansamblının üzvləri, habelə, bu ansamblın solistləri Yolçu Quliyev, Yavin Hümbətov,gənc aşıq, II dərəcəli əlil Azər Göyçəli (Mustafayev), müğənni Zeynəb Məmmədzadə, Elşən Sabiroğlu və başqaları maraqlı konsert proqramı ilə şəxsi heyət qarşısında çıxış etdilər.
Tədbirin sonunda tonqal qalandı.Qonaqlar, “Yallı” rəqsinin sədaları altında zabit və əsgərlərlə əl-ələ tutub rəqs etdilər.
“N” hərbi hissəsinin zabiti, şərəfli döyüş yolu keçmiş Elşən Yusifov ön cəbhədə Novruz şənliyini təşkil etdikləri üçün Şamil Sabiroğlu və Mahirə xanım Əsədovaya minnətdarlığını bildirdi.
Əvəz Almədətov,
“Ana harayı” qəzeti
Son şərhlər