Polşanın paytaxtı Varşavada yerləşən Modlin və Şopen hava limanlarında iki ayrı təyyarə ilə bağlı bomba xəbərdarlığı edildikdən sonra təhlükəsizlik tədbirləri həyata keçirilib.
Elchi.az xəbər verir ki, Varşava Modlin Hava Limanının sosial media hesabında yayımlanan məlumata görə, yerli vaxtla saat 09:54-də Polşanın milli aviadaşıyıcısı “LOT” şirkətinə məxsus, London Hitrou Hava Limanından Varşava Şopen Hava Limanına uçan “Boeing 737 MAX” tipli təyyarədə bomba olması barədə məlumat daxil olub.
Ümumilikdə 181 nəfəri daşıyan təyyarə saat 10:01-də Varşava Modlin Hava Limanına təcili eniş edib.
Enişdən sonra təyyarə xüsusi ayrılmış əraziyə yönəldilib, sərnişinlər və ekipaj üzvləri təxliyə edilib, səlahiyyətli şəxslər isə təyyarədə yoxlamalara başlayıblar.
Xəbərdarlıqdan sonra uçuşlar üçün müvəqqəti bağlanan Varşava Modlin Hava Limanı artıq fəaliyyətini bərpa edib.
Eyni zamanda, Polşa mətbuatında yer alan xəbərlərə görə, Varşava Şopen Hava Limanında da Danimarkanın paytaxtı Kopenhagendən gələn “Scandinavian Airlines” (SAS) şirkətinə məxsus təyyarə ilə bağlı bomba xəbərdarlığı qeydə alınıb.
Təyyarə yerə endikdən sonra sərnişinlər təxliyə edilib və təhlükəsizlik əməkdaşları təyyarədə yoxlamalara başlayıblar. Bu əməliyyatlarla əlaqədar hava limanının uçuş-enmə zolaqlarından biri müvəqqəti olaraq bağlanıb.
Məryəm




















