ABŞ-da seçicilər aralıq seçkilərdə səs vermək üçün seçki məntəqələrinə üz tutmağa başlayıblar. Bu, Prezident Donald Tramp administrasiyasının qanunvericilik gücünü və Konqres daxilindəki siyasi balansı müəyyən edəcək mühüm hadisədir.
Elchi.az xəbər verir ki, bugünkü seçkilər Nümayəndələr Palatasındakı 435 yerin hamısını və Senatdakı 100 yerdən 35-ni əhatə edir.
Aralıq seçkilərdə səsvermə ilk olaraq yerli vaxtla səhər saat 06:00-da (Türkiyə vaxtı ilə 14:00-da) Konnektikut, İndiana, Kentukki, Men, Nyu-Hempşir, Nyu-Cersi, Nyu-York və Virciniya ştatlarında başlayıb.
Saat qurşaqlarındakı fərqlərə görə, ABŞ-ın digər ştatlarında seçki məntəqələri müxtəlif vaxtlarda açılacaq.
Erkən səsvermə sentyabrın 18-də başlayıb
Bu gün səs vermək üçün son gün olsa da, müxtəlif ştatlarda bir çox vətəndaş sentyabrın 18-dən etibarən erkən səsvermədə iştirak edir.
Erkən səsvermə ilk olaraq sentyabrın 18-də Virciniya, Minnesota və Cənubi Dakota ştatlarında başlayıb, daha sonra digər ştatlarda da əlavə erkən səsvermə məntəqələri fəaliyyətə keçib.
Təxminən 210 milyon qeydiyyatdan keçmiş seçicinin olduğu ABŞ-da, 50 milyon nəfərin artıq erkən səsvermə vasitəsilə öz səsini verdiyi təxmin edilir.
İlk seçki məntəqələri İndiana və Kentukkidə bağlanacaq
Bu aralıq seçkilərdə ilk seçki məntəqələrinin yerli vaxtla axşam saat 18:00-da (Türkiyə vaxtı ilə 02:00-da) İndiana və Kentukki ştatlarında bağlanacağı gözlənilir.
Kentukkidən sonra hər bir ştat öz səsvermə prosesini müəyyən edilmiş vaxtda başa çatdıracaq. Saat qurşaqlarındakı fərqlərə görə, sonuncu seçki məntəqələrinin — Alyaskadakıların — 4 noyabr tarixində yerli vaxtla gecə saat 01:00-da (Türkiyə vaxtı ilə 09:00-da) bağlanacağı gözlənilir. ABŞ-da aralıq seçkilər
Amerika ictimaiyyəti öz ştatlarında qubernatorluq və digər yerli vəzifələr, eləcə də Nümayəndələr Palatasındakı 435 yerin hamısı və Senatdakı 100 yerdən 35-i üçün səs verir. ABŞ seçki sisteminə əsasən, Nümayəndələr Palatasının 435 üzvünün hamısı hər iki ildən bir seçkiyə çıxır: bir dəfə ABŞ prezidentinin seçildiyi ümumi seçkilər zamanı, bir dəfə isə aralıq seçkilər zamanı.
100 üzvdən ibarət Senatda isə altı illik müddətə seçilən senatorların üçdə biri hər iki ildən bir seçkiyə çıxarılır.
Konqresin hazırkı tərkibi
ABŞ Senatında hazırda Respublikaçılar 53, Demokratlar isə 45 yerə sahibdirlər. İki yer isə bir çox məsələlərdə tez-tez Demokratlarla həmfikir olan müstəqil namizədlərin əlindədir.
Nümayəndələr Palatasında Respublikaçılar 218, Demokratlar 45, müstəqil namizədlər isə 1 yerə sahibdirlər; iki yer isə hazırda boşdur.
Seçkilərin Konqres daxilindəki siyasi balansı müəyyən edəcəyi, bunun da öz növbəsində Tramp administrasiyasının qanunvericilik səlahiyyətlərinə təsir göstərəcəyi gözlənilir.
Məryəm
