ABŞ hərbçiləri təhlükəsizlik nəzərə alınaraq Çinin BYD istehsalçısına məxsus avtomobillərin Yaponiyanın Okinava prefekturasında yerləşən Kadena aviasiya bazasına girişini qadağan ediblər.
Elchi.az xəbər verir ki, bu barədə “The Japan Times” qəzeti məlumat yayıb.
Məhdudiyyət oktyabrın 26-da qüvvəyə minib və hələlik yalnız regionda ABŞ Hərbi Hava Qüvvələrinin ən böyük aviasiya bazalarından biri olan Kadenaya şamil edilir. Qərar Çin avtomobillərində ağıllı texnologiyaların istifadəsi ilə bağlı narahatlıqlar fonunda qəbul edilib.
“Hərbi obyektlərin komandirləri şəxsi heyətin, obyektlərin və tapşırıqların icrasının mühafizəsinə cavabdehlik daşıyırlar. Onlar real təhdidləri azaltmaq üçün risklərin qiymətləndirilməsini nəzərə alaraq qanunla nəzərdə tutulmuş təhlükəsizlik tədbirləri görə bilərlər”, – deyə ABŞ-ın Yaponiyadakı Silahlı Qüvvələrinin nümayəndəsi polkovnik Con Severns bildirib.
Nəşrin məlumatına görə, iyun ayında Pentaqon BYD-ni 188 Çin şirkətindən ibarət “qara siyahı”ya daxil edib. Bu qərar həmin şirkətlərin məhsullarının birbaşa satınalınmasına və onlar ilə müqavilələrin bağlamasına qadağa qoyulmasını nəzərdə tutur.
Qəzetin qeyd etdiyi kimi, Kadena aviasiya bazası ABŞ-ın regional hərbi əməliyyatlarında vacib rol oynayır. Bazanın ərazisində “Tomahawk” qanadlı raketlərini 1,6 min km-dək məsafəyə buraxmaq qabiliyyətinə malik ABŞ-ın “Typhon” raket kompleksi yerləşir.
Keçən ilin yanvarında ABŞ Ticarət Nazirliyi istehsalında Rusiya və ya Çin texnologiyalarından istifadə edilmiş, internetə çıxışı olan minik avtomobillərinin idxalını və satışını qadağan etmişdi.
Məryəm
