Nepal hakimiyyəti bir sıra ölkələrdən daşqın qurbanlarının axtarışı üçün dronlar, həmçinin meyitlərin identifikasiyası üçün DNT-test dəstləri xahiş edib.
Elchi.az xəbər verir ki, bu barədə Nepal XİN-i məlumat yayıb.
“Biz ABŞ-dən dondurucu kameralar, DNT-test dəstləri və lidar cihazları kimi zəruri qeyri-qida malları və xidmətlər istəmişik”, — deyə qurumdan bildirilib.
Ölkə, həmçinin Sinqapur və Çindən təbii fəlakət qurbanlarının identifikasiyası xidmətləri, səyyar yardım Məntəqələri və yüksək məhsuldarlığa malik dronlar tələb edib. XİN-dən bildirildiyi kimi, yaxın vaxtlarda analoji yardımın Yaponiya və Koreya Respublikasından da daxil olacağı gözlənilir.
Nazirlikdən qeyd olunub ki, “hazırda davam edən axtarış-xilasetmə işləri və yardımın göstərilməsi üçün bütün zəruri resursların qiymətləndirilməsi, sorğu edilməsi, alınması və səfərbər olunması məqsədilə ən yaxın qonşular və beynəlxalq ictimaiyyətlə səmərəli koordinasiya həyata keçirilir”.
“Biz artıq Hindistan, Çin, Yaponiya, ABŞ, Birləşmiş Ərəb Əmirlikləri, Koreya Respublikası, digər ölkələr və tərəfdaşlardan xilasetmə işlərində böyük yardım almışıq. Bu siyahıya səyyar yardım məntəqələri, dondurucu kameralar, generator qurğuları, günəş lampaları, DNT-test dəstləri, təcili yardım avadanlıqları, həmçinin çadırlar, ədyallar, yataq kisələri, ərzaq dəstləri, dərman preparatları və digər vasitələr daxildir”, — deyə XİN bəyan edib.
Məryəm
