Qadınlara qarşı zorakılığın qarşısının alınması, ailə münasibətlərinin möhkəmləndirilməsi və uşaqların hüquqlarının qorunması Azərbaycanın dövlət siyasətinin əsas prioritet istiqamətlərindən biridir. Bu sahədə məqsədyönlü tədbirlərin həyata keçirilməsi, cəmiyyətin maarifləndirilməsi və zərərçəkmiş şəxslərə dəstək mexanizmlərinin formalaşdırılması xüsusi əhəmiyyət kəsb edir.
Elchi.az Daxili İşlər Nazirliyinə istinadən xəbər verir ki, bunu daxili işlər nazirinin müavini İsmət Əliyev martın 3-də DİN-in təşkilatçılığı ilə “Qadınlara qarşı zorakılıq hallarının qarşısının alınmasında strateji əməkdaşlıq: imkanlar və perspektivlər” mövzusunda elmi-praktiki konfransda deyib.
O, ailə münaqişəsi, həmçinin məişət zorakılığı ilə bağlı polis orqanlarına daxil olan müraciətlərin araşdırılmasına xüsusi həssaslıqla yanaşıldığını, cinayətlərin, o cümlədən qadınlara və uşaqlara qarşı törədilmiş ailə-məişət xarakterli zorakılıq əməllərinin qarşısının alınması sahəsində Nazirlik tərəfindən aidiyyəti dövlət qurumları ilə birgə kompleks tədbirlərin görüldüyünü diqqətə çatdırıb.
Dövlət qurumlarının, qeyri-hökumət təşkilatlarının nümayəndələri və mütəxəssislər qadınlara qarşı zorakılıqla mübarizə sahəsində dövlət siyasətinin icrası, görülən işlər və qarşıda duran vəzifələrlə bağlı ətraflı məlumat verib, bu sahədə qanunvericilik aktları və milli proqramların zorakılığın qarşısının alınmasına, zərərçəkmiş şəxslərin müdafiəsinə və cəmiyyətdə sıfır tolerantlıq mühitinin formalaşdırılmasına xidmət etdiyini qeyd ediblər.
Tədbirdə “Zorakılığa məruz qalmış qadınların sosial və hüquqi yardımla təminatı” və “Erkən evlilik hallarının ağır fəsadları və hüquqi məsuliyyəti” mövzularında videoçarxlar nümayiş etdirilib.
“Ailə-məişət zəminində törədilən hüquq pozuntuları”, “Erkən evlilik hallarının ağır fəsadları və hüquqi məsuliyyəti”, eləcə də “Evlənmək məqsədilə adam oğurluğu (qızqaçırma)” mövzuları ətrafında çıxışlar dinlənilib, bu sahədə mövcud çağırışlar, qarşılıqlı maraq doğuran məsələlər ətrafında geniş və faydalı müzakirələr aparılıb.
