Türkiyənin xarici işlər naziri Hakan Fidan Bakıda keçirilən Türkiyə-Azərbaycan-Gürcüstan Üçtərəfli Xarici İşlər Nazirləri Toplantısından sonra verdiyi açıqlamada, Bakı-Tbilisi-Qars dəmir yolu xəttinin ən qısa zamanda tam gücü ilə istifadəyə verilməsinin vacibliyini vurğulayıb.
Elchi.az bu barədə Türkiyə mediasına istinadən xəbər verir.
Görüş münasibətilə bir daha Bakıda olmaqdan məmnunluğunu bildirən Fidan göstərilən qonaqpərvərliyə görə Azərbaycanın xarici işlər naziri Ceyhun Bayramova təşəkkür edib.
Fidan qeyd edib ki, mehriban qonşuluq münasibətləri və tarixi dostluq telləri üzərində qurulan üçtərəfli görüş mexanizmi ümumi maraqların və narahatlıqların müzakirəsi üçün unikal platformadır.
Tbilisidə keçirilən son görüşdən xeyli vaxt keçdiyini vurğulayan Fidan bu müddət ərzində həm beynəlxalq, həm də regionda böyük böhranların şahidi olduğunu xatırladıb.
Fidan Covid-19 epidemiyasının iqtisadi nizamı pozduğunu, nəqliyyat və təchizat zəncirinə mənfi təsir göstərdiyini vurğulayıb.
Fidan Rusiya-Ukrayna müharibəsinə toxunaraq, “Ukraynadakı müharibə bölgəmizdə və ondan kənarda hər gün daha çox insan və maddi yükə başa gəlməyə davam edir” -deyib.
İsrailin Fələstinə hücumları ilə bağlı nazir Fidan, “Qəzzada davam edən qırğın beynəlxalq sistemin zəifliyini göstərməyə davam edir” -deyib.
Bölgədə müsbət irəliləyişlərin olduğuna diqqət çəkən Fidan Azərbaycanın 30 illik işğaldan sonra öz ərazi bütövlüyünü bərpa etdiyini və Gürcüstanın Avropa İttifaqına (Aİ) namizəd statusu aldığını bildirib.
Fidan görüşdə regionda yeni vəziyyətin və əməkdaşlığın yaxşılaşdırılması yollarının axtarıldığını qeyd edərək, “Bizim qarşımızda Cənubi Qafqazı sülh, sabitlik və ümumi rifah məkanına çevirmək üçün real imkanımız var” -deyib.
Türkiyənin Azərbaycan və Gürcüstanla enerji və əlaqə sahələrində uğurlu əməkdaşlığının dərinləşdirilməsinə dair razılıq əldə olunduğunu deyən Fidan işlərin irəliləməsi üçün görüləcək işlərin müzakirə edildiyini vurğulayıb.
Nuranə Məmmədova
Son şərhlər