Əhməd Karaca məhkəmədə verdiyi ifadəsində Türkiyədən yük maşınları ilə İŞİD-ə silah və sursat aparıldığını bildirib
Türkiyə Milli İstihbarat Təşkilatına məxsus yük maşınlarını saxlamaq haqda təlimat verdiyi üçün həbs olunan prokuror Əhməd Karaca məhkəmədə səs-küylü açıqlamalar verib. Prokuror bildirib ki, MİT-ə məxsus TIR-ların ələ keçirilməsindən az müddət əvvəl Adanada raket başlıqları ələ keçib: “Bİz bu istintaq başlamamışdan qısa müddət əvvəl Adanada bir məlumat əsasında 1200 ədəd raket başlığı aşkarladıq. Sürücü dedi ki, daha əvvəl iki dəfə müxtəlif vaxtlarda iki yük maşını raket başlığı gətirib eyni yerə boşaldıb. Sürücünün nişan verdiyi yer Türkiyənin Suriya ilə sərhəddə yerləşən ərazisi idi, hansı ki hazırda həmin ərazidə İŞİD adlandırılan terror təşkilatının düşərgəsi mövcuddur”.
Mühakimə olunan prokuror bildirib ki, bu hadisədən az müddət sonra narkotik polisi təsadüfi yoxlama zamanı iki avtobusun yük yerindən böyük miqdarda sursat tapılıb: “Bu hadisədən az sonra narkotik polisinin yoxlaması zamanı təsadüfən iki avtobusun yük yerindən böyük miqdarda sursat tapıldı. Bütün bu həngamədə yaşanan açıq – aşkar hadisələr zamanı həssaslıq göstərən prokuror və təhlükəsizlik əməkdaşlarını günahkar elan edə bilməzsiniz”.
Qeyd edək ki, 2014-cü il yanvarın 19-da Türkiyə jandarma qüvvələri Adana ərazisində Suriyaya silah və sursat aparmaqda şübhəli bilinən 3 TIR saxlayıb. “Radikal” qəzetinin yazdığına görə, jandarma qüvvələrinin Tarsus-Adana-Qaziantep magistralının Ceyhan hissəsində saxladığı yük maşınlarında axtarış aparıb. Həmin vaxt yük maşınlarından böyük miqdarda silah və sursatın tapıldığı haqda xəbərlər yayılsa da, sonradan hökumət maşınlarda humanitar yardım olduğunu bəyan edib və yük maşınlarını saxlayaraq axtarış aparan yüksək rütbəli məmurlar, o cümlədən axtarış əmri verən prokuror barədə məhkəmə iddiası qaldırılıb.
Son şərhlər