Bakı şəhəri, Binəqədi rayonu, Şövkət Məmmədova küç., 11, mən. 103-də yaşayan Əliyev Əsəd Yaqub oğlu qafqaznews.org saytına müraciət edib. Müraciətdə deyilir:
“ Mən 9 mərtəbəli binanın 2-ci mərtəbəsində yaşayıram. Bu yaxınlarda mənim eyvanımın altında tikinti işləri aparmağa başladılar. Məlum oldu ki, 1-ci mərtəbədə, mənim mənzilimin altındakı 101 saylı mənzil kiməsə satılıb. Həmin mənzilin yeni sahibi öz evində dəyişiklik etmək qərarına gəlib və bizim küçəni zəbt eləmək istəyir. Yeni sahib əvvəlcə “beton zirzəmi” tikdi. Bu isə sakinlərin narazılığına səbəb oldu. 
Əsəd Əliyevin sözlərinə görə, icra hakimiyyəti orqanları bu qanunsuzluğa seyrçi yanaşdılar: “ Nə Binəqədi icra hakimiyyəti, nə də hüquq-mühafizə orqanları qanunsuz inşaat işlərinə mane olmadılar.
Əliyev qanunları saya salmayan “təzə ev sahibi”nin kimliyi ilə maraqlanıb. Və bunun üçün 1 saylı KMİS-in rəisi Mahmud Həsənliyə müraciət edib. Mahmud Həsənli ona bildirib ki, siz sakinlər özünüzü yormayın, heç nə edə bilməyəcəksiniz, onlar tikintini başa çatdıracaqlar.
Rəis onu da bildirib ki, 101 saylı mənzilin kimin adına rəsmi qeydə alındığını bilməsə də, əsl sahiblərinin Ədliyyə Nazirliyində Məhkəmə Qərarlarının İcrası Baş İdarəsinin rəisi Xanlar Zeynalova və Bakı ŞİH-nin Kommunal Təssərrüfat İdarəsinin rəis müavini Vidadi Əliyev olduğunu bilir. 
KMİS-in rəisi Əsəd Əliyevə onu da bildirib ki, tikinti qanunsuz olsa da, sonda Bakı ŞİH-nin başçısı Hacıbala Abutalıbov tikintini sənədləşdirib qanuni don geydirəcək.
Əsəd Əliyev Mahmud Həsənli ilə aralarındakı relefon söhbətinin yazısını da bizə təqdim etdi. Hansıkı həmin danışıqda Mahmud Həsənli tikintinin əsl sahiblərinin Ədliyyə Nazirliyində Məhkəmə Qərarlarının İcrası Baş İdarəsinin rəisi Xanlar Zeynalova və Bakı ŞİH-nin Kommunal Təssərrüfat İdarəsinin rəis müavini Vidadi Əliyev olduğunu bildirir.
Məsələyə aydınlıq gətirmək üçün Mahmud Həsənliyə müraciət eləsək də o sualımıza cavab verməkdən imtina elədi.
Onda biz Bakı ŞİH Mənzil Kommunal Təssərrüfat Departamenti sədrinin köməkçisi Sabit Hüseynova müraciət elədik. O, bildirdi ki: “ Qanunsuz tikintinin Vidadi Əliyevə məxsus olması həqiqətə uyğun deyil. Vidadi Əliyev özü qanunsuz tikililəri sökür”.
Ədliyyə Nazirliyinin mətbuat katibi Aydın Ağazadə isə qanunsuz obyektin Xanlar Zeynalova məxsus olması ilə bağlı sualımıza belə cavab verdi: “ Ədliyyə Nazirliyinin fəaliyyətinə aid olmayan suala şərh verə bilmərəm”.
(qafqaznews.org)
