Meksikada 43 tələbənin qətlində şübhəli bilinən şəxslər günahlarını etiraf ediblər

APA-nın İTAR-TASS agentliyinə istinadən verdiyi xəbərə görə, bunu Meksikanın Baş prokuroru Xesus Murilyo Karam bəyan edib.

Onun sözlərinə görə, bu yaxınlarda saxlanılan qruplaşmanın üç üzvü tələbələrin qətlində iştirak etdiklərini etiraf edib. Məlum olub ki, qatillər əvvəl tələbələri güllələyib, sonra isə yandıraraq cəsədlərini torpağa basdırıblar.

Sentyabrın 26-da İqualada polis əməkdaşları silahlı mülki şəxslərin müşayiəti ilə təhsil islahatlarına qarşı etiraz aksiyası keçirən tələbələrə hücum ediblər. İstintaq zamanı müəyyən edilib ki, iğtişaşlardan dərhal sonra  asayiş keşikçiləri saxlanılan tələbələri cinayətkar qruplaşmanın üzvlərinə təhvil veriblər.